Korrika 14tik ez zen Bilbo Korrikaren helmuga. Orduan, Garbi Alkortak zuzendu zituen azken egun hartako ekitaldiak. Harrezkero lotura zuzena du Garbik Korrikarekin. Bilboko kilometroen arduradun moduan, hain zuzen ere.
Aurtengo Korrika 19k kilometro asko izango ditu Bilbon, 45 kilometro zehatz-mehatz. Bi hile barru, martxoaren 29an, goizeko 7etan Enekuritik sartuko da eta bost ordu eta erdiren ostean, 12:30ean, Areatzan bukatuko da. Lan handia ematen du ibilbidearen diseinuak, besteak beste, auzotarren eskariei erantzuten ahalegintzen delako AEK eta era berean Udalaren adostasuna jaso behar duelako.
Garbik aurreratu digunez, aurten lehen aldiz pasako da Korrika Olabeagatik eta Deustuko Erriberatik. Baita Atxuritik ere. "Nik dakidala lehen aldiz ibiliko da Korrika Atxurin", dio auzoan bertan bizi den Garbik irribarretsu.