Espainiako Auzitegi Nazionalak bi urteko kartzela zigorra, 5 urteko zaintzapeko askatasuna eta 16 urteko inhabilitazioa eskatzen zion, twitterren "terrorismoa goratu eta biktimak umiliatzea" leporatuta. Gaur epaituko zuten Madrilgo Entzutegi Naizonalean, baina epaiketa hasi baino lehen defentsako eta akusazioko abokatuak akordio batera heldu dira, eta Alfredo Remirezek ez du kartzelara joan beharko. Ordea, urte eta erdiko kartzela zigorra eta hamalau urte eta sei hilabeteko inhabilitazioa ezarri diote.
'Armiarma Operazioa'
'Armiarma Operazioaren' hirugarren fasean Alfredo Remirez gain beste hamazortzi lagun atxilotu zituen Guardia Zibilak Bizkaia, Araba eta Gipuzkoan. Tartean da Andeka Jurado, zeini urtebete eta zortzi hilabeteko kartzela zigorra ezarri zioten joan den urtarrilean. Aste honetan bertan, beste sei txiolari pasako dira Espainiako Entzutegi Nazionaletik, Remirezi egotzitako antzeko karguekin. Besteak beste, bi urte eta sei hilabeteko kartzela zigorra eskatzen diote Cassandra @kira_95 txiolariari Carrero Blancoren inguruko txisteak egiteagatik.