Auzoko inauterien atarian, mobilizazio zaratatsua egingo dute Santutxun "euskal preso politikoak gogoan eta beraien askatasuna eskatzeko". Mozorrotuta eta kantuka egingo dute ostiralean manifestazioa 20:00etan Egunkaria plazatik abiatuta. Zarata egiteko tresna eta gailuak eramateko dei egin diete auzotarrei. "Txistuak eta kazola zaharrak" eramateko.
Euskal preso, iheslari eta deportatuen eskubideen aldeko sare herritarrak egin du deialdia. "Inauteriak badatoz auzora baina oraindik presoak falta dira", dio Santutxuko Sarek okasiorako prestatu duen bertsoan. "Etor zaitez gurekin batera", esanez luzatu du gonbidapena jendartean.
Manifestazioa bukatzean, harrera egingo diote lehengo otsailaren 4an aske geratutako Aingeru Cardaño santutxuarrari, kondena bere osotasunean bete ostean. 2015eko irailaren 1ean atxilotu zuten Cardaño. 2014ko azaroan hiru urteko kartzela zigorra ezarri zioten Aitor Fernandez Piol indautxuarrarekin batera, 2001ean kutxazain batzuen kontra egindako erasoagatik.
