Dagoeneko, 2014ko Aste Nagusiko zenbait hitzordu ezagutzen ari gara. Esaterako, gaur jakinarazi dute Hiri krosa abuztuaren 22an izango dela.
Guztira 5 lasterketa egingo dira. Lehenengoa pre benjamin, benjamin eta alebinena izango da (650 metro), hau da, 2002 eta 2007 urte bitartean jaiotako korrikalariena. 250 dortsal egongo dira; neskak 17:00etan aterako dira Areatzatik eta mutilak 17:15ean.
Ondoren, haur, kadete eta gazteen txanda izango da (1,5 kilometro); 1997 eta 2001 urte bitartean jaiotakoena. 150 dorsalek osatuko duten martxan, neskak 17:30ean abiatuko dira Areatzatik eta mutilak, 17:45ean.
Hirugarren lasterketa 18:00etan izango da (3 kilometro), gurpil-aulkidunena hain zuzen ere, eta 15 dortsal egongo dira. Jarraian, txupete eta txikiek, 2008 eta geroko urteetan jaiotakoek, 400 metro egingo dituzte korrika. Guztira 300 dorsal egongo dira; nesken irteera 18:20ean izango da Areatzan eta mutilena, 18:30ean.
Bukatzeko, 1200 senior eta beteranok 6 kilometroko lasterketa egingo dute. 1996 eta aurreko urteetan jaiotakoen martxa mistoa izango da eta 18:45ean emango zaio hasiera.
Aste Nagusiko Hiri Krosean parte hartzeko izena eman ahalko da uztailaren 15etik aurrera. Parte hartzea doakoa da.