Baltza zan gaua gaueko baltzean, eta gaua zan baltza baltzaren gauean, baltza zan lurra, eta baltza zan ortzia, eta baltza zan lurra eta ortziaren arteko lerro fina. Hodeiak baltzak ziran, eta iretargi barria be baltza zan, eta baltza zan iretargiak lurraren ganean zabaltan euan beltxarga baltzaren lumaz egindako edredoi baltza. Baltza eta beroa. Izeko zaharraren mosu amoltsu eta bustiak bezain beroa, galerna aurreko giroa bezain bero eta hezea, narrutaldiaren ondoko besarkada arnasestuek bezain bero eta itsaskorrak. Eta beroa izarretan eta sastraketan itsasten zan masusta marmeladea praka zuriei itsasten jaken bezalaxe. Baltzak eta beroak ziran Chacoaren historia osoan zehar hildako animali guztien arimak, eta jaguareteen arimak ehizean ebizan orkatz, pekari, eta ñanduen arimak sekulan aseko ez dauren gosea asetzeko. Eta orkatz, pekari eta ñanduen arimak behinola hildako bedarren arimak bazkatzen ebizan arimaren gosea arimak janaz asetzerik balego lez.
Eta baltza zan asfaltoa, eta baltza argirik ezean ziztu bizian ebilan autbusa, eta baltzeranak ziran gauaren baltzean jaitsi, igo eta lo egiten auren langileak.
Eta egunsentian Filadelfiara iritsi nintzan.
Zapatu baten suertatu zan
eguna oso bustia
joan beharra iritsi jatan
ta jaso nauen guztia
autobusera igon nintzan ta
senti pixkat errukia
Ciudad del Esten ekaitz itzela
Chacon barriz eguzkia.
Eguerdia baino lehenago
euriari emon eutsan
autobusean jarraitu eban
Noeren uholde gisan
larre guztiak urez ginezka
nire kautan naban esan
bertako putzu guzti-guztiak
barriz betetan ebizan.
Gero ta gero be gauerako
ailegatzia izan zan
baina onino itxaronaldi
luzea behar nik jasan
banku batean eseri nintzan
nolabait denbora pasan
hiru ordutan itxaron eta
barriz martxan jarri nintzan.
Autobusera igo gentzezan
bertan gintzezanok zama
ezezagunak guzti-guztiak
misterioaren xarma
gaztelerarik ez zan entzuten
niretzat pixkat be drama
salbuespena bidaikideetan
ume bat ta bere ama.
Bidaian gora abiatu ginan
erdi lotan gengozanak
begiak zabal edukitzeak
ekarkuzan guri lanak
lantzeminetan jendea jaitsi
ta igo barriz andanak
joan-etorria etengabea
ta dan-danak baltzaranak.
Gauez egina ta erdilotan
izan zan bidai handia
erdi etzunda jarleku baten
bidai erdi ta erdia
baina guztiak akaberea
dekola danez egia
egunsentian Filadelfian
izan zan geldialdia.
Argazkian dago nola topa neban Filadelfia goizeko sei t´erdietan.