Lehia bakoitzean lehenik aipatuak Anboto bizkaiko mendiaren izenean, eta besteok Gorbearenean jokatuko dute, historian lehenbizikoz Asegarcek antolatu duen taldekako torneo honetan. Bitxia egin zaio ikusle arruntari, eta ez hain arruntari ere, norbaitek edo norbaitsuek partida irabazi eta sailkatu gabe geratzea, eguneko lehietan kideak galtzen zutelako. Pozik ei daude esperientziaz, finalean gertatuko denaren zain.
Bihar, astearte arratsaldez jokatuko den funtzio hori, aurtengo Asegarceren feriako lehena da. Hurrengo egunetan hasiko delako bi finalerdi eta finalaz osatutako Aste Nagusia Torneoa, Asteazken eta ostegunez final aurrekoak eta larunbatean finala. Ez dira esku pilotak izan dituen edo dituen garai hoberenak, enpresek kuadro edo taldeak murriztuz doaz baina dagoenetik figurarik behineak programatu ditu Bilboko enpresa honek sortzearen 25. urteurrena edo zilarrezko ezteiak ospatzeko.
Olaizola II-Urrutikoetxea (atzelari, 2016.eko txapelketan bezala); Elezkano II eta Zabaleta, (iazko txapeldunak) elkarren kontra lehen finalerdian. Bigarrenean Bengoetxea-Larunbe vs. Altuna III eta Rezusta, eta ohi bezala bi partida horietako irabazleak, nor baino nor, larunbateko finalean. Egun osoko jaia antolatu dute Asegarcekoek eztei horien aitzakian, besteak beste pilotari, jokalari ohi, agintari eta lagunentzako bazkari erraldoia Miribillako frontoian bertan.
Lehenik, pilotarien publizitate eta ordezkari eskubideek kudeatzeko sortu zen ASEGAR elkartea eta handik gutxira jaialdiak antolatuz pilota enpresa bezala aurkeztu zen garai hartako izar pila bat eskuratuz. Maiz, Errandonea, Salbidea, Beloki, Armendariz, Ariznabarreta, Elkoro, Unanue, Arretxe, Titín eta abar luze bat kuadroan lerrokatuz. Karmen jai egunean, 1992.eko uztailaren 16.en Zornotzako Amorebieta IV frontoian eman zuten lehen jaialdia.
Badu Aste Nagusiak, palaz eta xisteraz ere zeresanik eta hurrengo egun baten ekingo diogu horri ere. Neronek ere Miribilla aldera igo dut gaurko jarduna, eguneroko Zazpi Kale, Areatza eta besteal alde batera utziz. Laster hara bueltatuko naiz. Zin dagit!