Bilboko Udalak –BilbaoMusikarekin elkarlanean- bat egin du ekimenarekin eta, ondorioz, gure hiria jaialdiaren egoitzetako bat izango da. Biharko, maiatzaren 6ko arratsaldean eta larunbateko, maiatzaren 7ko goizean kontzertu programazio zabala eskainiko da Areatzan, musika klasikotik rockera, popera eta jazzera. Kontzertuak ordutegi hauetan izango dira: ostiralean 17:30etik 20:30era eta larunbatean 11:30etik 14:00etara.
Bilboren kasuan, Frantziako Ecole de Musique Autrans, Italiako Fondazione Scuola di Musica C. e G. Andreoli eta Poggio a Caiano, eta Alemaniako Musikschule der Stadt Bonn eta Musik der Bundesstadt Bonn taldeek hartuko dute parte. Bertako ordezkaria Bilboko MrJam Centro Moderno de Musica izango da.
Emusik, Donostia 2016ren, Europako Kultur Hiriburuaren, egitasmoa da, eta egoitzak izango ditu Autonomia Erkidegoko, Nafarroako, Iparraldeko eta Errioxako hainbat herritan. Udalerri horietan, Europako hogei herrialde ingurutik etorritako partaideak arituko dira: Espainia, Bulgaria, Txekiar Errepublika, Danimarka, Estonia, Finlandia, Frantzia, Alemania, Hungaria, Italia, Letonia, Liechtenstein, Luxenburgo, Norvegia, Austria, Polonia, Eslovakia, Suedia, Suitza eta Herbehereak.
Emusik jaialdi bat baino gehiago da. Musika elkartzen gaituen hizkuntza komuna dela dioen ideian oinarrituz, ekitaldia, kultura eta lurralde anitzetako ezagutzak eta esperientziak trukatzeko eta Europako herrien arteko hurbilketa eta trukatzea bultzatzeko aukera paregabea izango da.
Gainera, jai eta musika ospakizunaz gain, jaialdiak ikusgaitasun handiagoa eman nahi dio musika eskolek maila guztietan (toki, nazio eta Europa mailan) egiten duten etengabeko lan bikainari.