"Bidegabeko kaleratzea" gaitzetsi dute Misericordiako langileek

ELA sindikatuaren eskutik elkarretaratzea egin dute gaur Sabino Arana etorbidean dagoen nagusien egoitzaren aurrean, eta pandemiaren ondorioz lan karga areagotu denez, langile guztiak "inoiz baino beharrezkoagoak" direla aldarrikatu dute

Gaur goizean Sabino Arana etorbideko Misericordia nagusien egoitzaren aurrean bildu dira bertako langileak eta ELA sindikatuko ordezkariak.

Azaldu dutenez, joan den urriaren 13an lankide bat kaleratu zuen enpresak, antolakuntzarekin eta ekoizpenarekin lotutako arrazoiak argudiatuta, eta lanpostua amortizatu zuen. Langilea ezintasun luze baten ondoren lanera itzuli zenean gertatu omen zen hori.

Bada, ELAko kideek uste dute "ez dagoela arrazoirik" kaleratzeak gauzatzeko. Izan ere, Covid-19aren pandemiak lan kargak areagotu ditu nagusien egoitzetan, eta, azpimarratu dutenez, "langile guztiak behar dira" eguneroko zereginak aurrera atera ahal izateko.