Metro Bilbaoren Moyua geltokia Bizkaiko Foru Aldundiaren Jauregiaren erreplika bihurtuko da, gaurtik aurrera eta uztailaren 15era arte, eraikin enblematiko horren 125. urteurrenean. Diputazio kaleko sarbidetik, metrora sartzen den orok foru egoitzara sartzen direnei ongietorria egiten dien alfonbra gorri bereizgarria aurkituko du.
Geltokian jarritako alfonbra horren erreplikak sarbide horretako atalondoa, mezzanina eta eskailerak, zeharkatzen du, eta bi nasetaraino eta Elcano eta Ercillako sarbidearen mezzaninaraiono iristen da.
Era horretan, moketa gorriak nasetaraino eramango ditu bidaiariak, eta bertako hormetan Foru Aldundiaren elementuen erreplikak ikusi ahal izango dituzte, hala nola eskailera nagusian nabarmentzen den beiratea, edo Harrera Aretorako sarrera, non urtero San Inazioren Harrera egiten baita.
Geltokia are gehiago girotzeko, bankuak Bizkaiko Foru Aldundiaren egoitzaren garaiko besaulkiak bezala daude ‘tapizatuta’, eta Harrera Gela argitzen duten lanparak eta areto horretako sarreran esekita dagoen tamaina handiko brontzezko erlojua erreproduzitu dira nasako teleadierazleetan.
Apainketaren ‘azken ukitua’ pantaila digitalek jartzen dute; izan ere, horietan bizia hartzen dute Foru Jauregiko aretoetan erakusten den bildumako pintura garrantzitsuenetako batzuk protagonizatzen dituzten irudiek.
125 urteko historiaren ospakizuna
Luis Aladrén arkitektoak proiektatuta, jauregiaren eraikuntza 1900ean amaitu zen, hori dela eta, Foru Jauregiaren 125 urteko historia ospatzeko Bizkaiko Foru Aldundiak Moyuako geltokiaren eraldaketa jarri du abian, beste hanbat ekimenekin batera, hala nola doako bisita gidatuen bultzada, Jauregiari buruzko argitalpen berri bat, eta dibulgazio-podcasten sorrera.