"Rekuerdo onakaz" utziko du Juanitak Zamakona II taberna

uriola.eus 2017ko eka. 15a, 13:35
Juanita Ormaetxe Zamakona II tabernako barran

Maria Muñoz kalean Muga izenari 33 urtetan eutsi dion tabernako ateak itxi zituen atzo gauean Juankar Bilbaok. Aurrerantzean jabe berriak izango ditu Mugak. Gaur Juanita Ormaetxek itxiko du Somerako Zamakona II taberna.  

Hamaika urte eman zituen tabernari Somera kalera ailegatu baino lehen. Semillas Antuñanok orduan betetzen zuen lokala hartu zuen Zamakona II taberna zabaltzeko. 38 urte eman ditu bertan Juanitak, "beti jende artean, gustura". Gaur, goizean "paper batzuk" konpondu ostean, azkenengoz zabalduko du taberna. 22:30ean itxi eta azken metroa "koiuko" du etxera joateko. 75 urterekin jubilatzea erabaki du. 

Juanita Zamakona bezala ezaguna den arren, bere abizena Ormaetxe da. Zamakona bere gizona zen. Duela hiruzpalau hamarkada "horrela izan behar zela" pentsatzen eta jarduten zelako ipini zion senarraren abizena tabernari. Baina argiro dio taberna berea izan dela (bere izenean egon da), eta berak gobernatu duela. Noizbehinka lagundu ere egin diotela aitortzen du. Somera kaleko tabernari aintzindarietako bat izan da bera.

Azken urteotan lanari aurre egitea inoiz baino gehiago kostatu zaio Juanitari. Horregatik hartu du erretiratzeko erabakia.
 
Bezero eta auzokideek berria jakin dutenean agur egitera joan zaizkio. Loreak ere eraman dizkiote. Etxean lore asko dauzkala eta, gaur bezero eta lagunen artean banatuko ditu. 
 
Aurrerantzean nahi beste denbora izango du. Ez daki ondo zer egingo duen aurrerantzean baina "zeozer", zereginen bat edo beste topatuko du. "Lurrazpira begiratu eta satorrak ikusi, besterik ez bada". 
 
Pegatinen taberna
Asko izan dira Zamakona II tabernan bezeroek itsasi dituzten pegatinak, bilduma handia osatzeraino. Maiatzaren 1ean hormakoak kendu egin zituen, ez Udaleko teknikoek behartuta, "harei ez entzuteagatik" baizik. Barra azpian eta gainean geratzen diren pegatinekin zer egingo duen ez du argi Juanitak. 

 

Gizartea Alde Zaharra