Bidebarrieta Zientifikoa: 'Zer da benetan dieta osasungarri eta jasangarri bat?'

Bidebarrieta Liburutegia, Alde Zaharra

Benetan jabetzen al gara elikadura arloko erabakiek ingurumenean eragiten duten inpaktuaz? Nola murriztu ahal dugu elikadurari lotutako karbono-aztarna? Eta oroz gain, ba al dakigu zehazki zeintzuk diren gure dietak bete behar dituen ezaugarriak osasungarria eta jasangarria izan dadin?

Gai horiek guztiak argitzeko, Nerea Telleriak, Euskal Herriko Unibertsitateko Nutrigenomika eta Nutrizio Pertsonalizatuko doktoreak, “Zer da benetan dieta osasungarri eta jasangarri bat?” izenburuko hitzaldia emango du datorren asteazkenean, urtarrilak 19, 19:00etan, Bilboko Bidebarrieta Liburutegian (Bilbon).

Hitzaldi-solasaldia UPV/EHUko Kultura Zientifikoko Katedrak eta Bidebarrieta Liburutegiak bultzatutako Bidebarrieta Zientifikoa hitzaldi-zikloaren barruan antolatu da, eta modu presentzialean jarraitu ahal izango da, baita streaming bidez ere KulturguneaTB kanalean. Sarrera librea da aforo bete arte.