"Gure heroiak" liburuaren aurkezpena eta dekolonitatearen inguruko hitzaldia

Zirika! herri guneak (Ronda, 12) Axier López, Argiako kazetariaren "Gure Heroiak" liburuaren bueltan hitzaldi bat burutuko du azaroaren 10ean, ostegunean, 19:00etan. Axierrek liburuaren edukiaren inguruan mintzatuko da eta  Luciana Alfarok, EHko emakume arrazializatu eta migratuen sareko militantea, dekolonitatean sakonduko du.
Liburuaren pasarte txiki batekin uzten zaituztegu gehiago jakiteko gogoak pizten joateko.

Anima zaitezte!!!

“Ez zu eta ez ni ez gara kolonialista, inbaditzaile, konkistatzaile, ezta esklabista ere. Munduko beste muturreko indigena basatiak akabatu, gainerakoak Kristoren gurutzearen itzalpean “zibilizatu”, eta beren lurrak eta ondasunak arpilatzea ez da egun norberarentzat aldarrikatzeko moduko zerbait.
Inork ez ditu bere egiten euskal herritar askok (ere) mende luzez egindako astakeria horiek. Baina konkistatzailea esploratzaile, kolonizatzailea humanista eta esklabista enpresa-gizon bilakatuz gero, orduan errazagoa da.
Hau ez da gure buruen larrutzea. Gu ez geunden han. Ordukoaz guk ez dugu ardurarik. Baina iraganean gertatutakoa hemen eta orain ospatzen dugunean, zuritzen dugunean, hango protagonistak leku pribilegiatuetan mantentzen ditugunean, kaleen izenetan eta plazetako eskulturetan, orduan bai, ardura gurea da. Gu hemen gaudelako.”