Joan den astean iragartzen genuen bezala, Bilboko auzoetako jaien bolada abian da. Hala, behin Indautxu eta Zurbaranbarriko jaiak ospatu eta gero, Alde Zaharrekoen txanda da.
Era horretan, txupina arratsaldeko 20:00etan izango da Posta Kaleko 23. zenbakian eta bertan ekingo diote jaien lehendabiziko egunari “Ez Dok Hiru” antzerkiaren bitartez. Bihar eta ostiralean, ordea, lehenago ekingo diote aisialdi ekitaldiek; ostiraleko kasuan gainera, aukera izango da gauez parranda jarraitzeko, 7Katu gaztetxean Dj Juseffek eskainiko duen kontzertuari esker.
Larunbata izango da ekitaldi gehien antolatu diren eguna; goizeko 9:00etan Diana gaiteroekin hasita eta Bidean Erromeriarekin bukatuta. Azkenik, igandean, ekainaren 4an, egunean zeharreko ekitaldi desberdinekin emango diete amaiera jaiei: 13:00etan BertsoPoteo musikatua Miren Amuriza eta Igor Elortzarekin, 14:00etan Plaza Berrian antolatuko den parrilladarekin eta 16:30etan leku berean jokatuko den auzoko emakumeen futbito txapelketarekin.