uriola.eus

Eratu dugu Tokikom, euskarazko hedabide lokalen elkartea

2008an hasitako bideari jarraiki, Topagunean federatutako 19 tokiko hedabidek, tartean PREST! aldizkariak, TOKIKOM SL enpresa sortu dugu (joan den larunbatean, hilak 17) Eskoriatzako HUHEZI fakultatean eginiko batzarrean, tokiko hedabideen erronkak eta etorkizuna elkarlanean lantzeko.

Euskal Herri osoko 19 euskarazko tokiko hedabidetako ordezkariek aho batez onartu dituzte (martxoaren 17an) Eskoriatzan egindako batzar eratzailean Tokikom elkartearen estatutuak. Hala, besteak beste onartu dute sozietate mugatu izaera izango duela erakundeak, eta hasierako kapitala, 25.000 eurokoa izango dela. Egoitza Andoainen izango du Tokikomek, Topagunearen leku berean.

Mikel Irizarrek, Tokikomen eratze prozesuan aholkulari lanetan ibili denak esan du behin elkartea ofizialki eratuta, apirilean antolaketa zehazteko lanari ekingo diotela, eta maiatzetik aurrera operatibo egotea dela asmoa, besteak beste esparru komunak kudeatuz (esaterako, publizitatea), solaskidetza bultzatuz eta integrazio funtzionala landuz. Toki hedabideen azpisektorea indartzeko asmoa azaldu du irizarrek, baita euskal hedabideen sektorean eragile izatekoa ere.

Irizarren esanetan, euskarazko tokiko hedabideen kontsumitzaileek ere nabarituko dute Tokikom eratu izana: "Gutxienez toki hedabideek jarraituko dutela nabarituko dute; Tokikomen egitekoetako bat da toki hedabide gehiago ez istea, ez behintzat ezintasunagatik".

Tokiko kontzeptua irekitzea ere ekarriko du Tokikomek Irizarren iritziz, interesak herrietara murriztu beharrean, eskualdeetara zabalduz esaterako.

Hedatzen joateko asmoa

Momentuz 19 hedabide daude Tokikom barruan, baina asmoa da Topaguneko gainerako hedabideek ere bat egitea ekimenarekin, baita Topagunetik kanpo dauden euskarazko beste toki hedabideek ere.

Argazkia: Txomin Madina (GOIENA)

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa