uriola.eus

Heziketa premia bereziez eta sexualitateaz hausnartzeko ikastaroa

Ageriko behar eta eskaerei erantzun asmoz, Bizkaiko Urtxintxa Eskolak eta Emaize Sexologia Zentroak ikastaro espezifikoa elkarlanean ematea erabaki dute.

Heziketa premia bereziez eta sexualitateaz hausnartu eta ikasteko aukera izango da apirilaren 12tik aurrera, Gasteizen. Ostiral arratsalde eta larunbat goizetan izango da ikastaroa eta gaian interesa duen hezitzaile edo lagun orori dago zuzenduta.

Aspalditik antzeman da heziketa premia berezien gaia zehar lerro ezberdinen ikuspuntutik aztertu eta lantzeko apustua egin beharra dagoela; baita alderantziz ere, sexualitatea aniztasunean aztertuz.

Sexualitatea gizaki guztien alderdi eta ezaugarria dela esan dezakegu, eta honenbestez, pertsona guztiek sexu-hezkuntza garatzen dugu. Hezkuntza hori, askotan, oharkabean ematen da, eguneroko jarreren bidez, belaunaldien arteko balioen transmisioan… Horregatik, hezkuntza prozesu ororen parte aktibo direnen esku dago egoera hauek guztiak esplizitu egin eta jorratzea.

Behar bereziak dituzten pertsonen sexualitatea errealitate ezezaguna da gehienontzat. Formazio proposamen honek pertsona hauen sexualitateen arreta merezi duen tokian jartzea du helburu, gainerako sexualitateen leku berean. Horregatik, sexualitateari eta behar bereziei buruzko eduki teorikoak eskaintzeaz gain, zailagoak egiten zaizkigun egoeretan lantzeko estrategiak eskainiko dira saio hauetan; agerian utziz, horien aurrean ez duela balio isiltasunak edo ez esku hartzeak.

Apirilaren 5era arte, matrikula zabalik

Ikastaroaren helburuak eta eduki sorta Urtxintxa Eskolaren webgunean aurki dezakezue, matrikulazio ataleko ikastaroaren fitxan. Bertan formularioa beteta matrikula daiteke, emailez edota telefonoz deituz.

INFO + URTXINTXA

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa