Greba eguna egin dute gaur Hego Euskal Herriko ikasleek, Euskal Eskola Nazionala exijitzeko eta LOMCE, Heziberri edota `Estrategia Universitaria 2015´ bezalako erreformak errefusatzeko.
Hiriburuetan manifestazioak egon badira ere, protestak Euskal Herri osora zabaldu dira. Bilbon hiru zutabe egin dituzte goizean; 11:30ean Arriagatik abiatu dena, 11:30ean San Inaziotik atera dena eta 12:00etan San Mamesetik hasi dena. Hirurek Jesusen Bihotzean izan dute amaiera eta bertatik, 12:30ean, Ikasle Eztandaren izenean manifestazioa egin dute 8.000 lagun inguruk. Gauzak horrela, azken urteotako ikasle protesta jendetsu eta parte hartzaileena izan da.
Manifestazioak hasiera lasai izan du “Ez, ez, ez LOMCE ez”, "Gazte altxa, hasi da iraultza", “Borroka da bide bakarra” eta “Hezkuntza herritik herriarentzat” ohiu artean. Baina Institutu Zentralera heltzean, eraikina okupatzen ahalegindu dira eta polizia agenteek euren kontra egin dute. EFE berri agentziak jakitera eman duenez, Ertzaintzak lau lagun atxilotu ditu desordena publikoa egotzita.
Martxa Areatzan bukatu da eta ikasleak bertan geratzeko asmoa erakutsi dute arratsaldeko manifestaziora arte. 18:00etan, plaza Eliptikotik abiatuko da martxa. Bien bitartean, hitzaldiak eta tailerrak antolatu dituzte.