"Val de Susa NO TAV Elkartasuna! Kriminalizaziorik ez!" lelopean, elkarretaratzeak egingo dituzte gaur arratsaldean, Donostiako Boulebardeko kioskoan eta Bilboko Ercilla kaleko 14. zenbakian dagoen italiar kontsulatuaren aurrean. Era horretan gaur bertan epaituko dituzten No TAV mugimenduko kideei babesa adierazi nahi diete.
Chiara, Claudio, Mattia eta Niccolo Alessandria, Ferrara eta Erromako espetxeetan bananduta daude 2013ko abenduaren 9tik. Laurak "terroristatzat" salatu dituzte konpresore bati ustezko kalteak eragin dizkiotelakoan eta ondorioz, 30 urteko kartzela zigor eskaerari aurre egin behar diete.
Gauzak horrela, Euskal Herriko AHTren aurkako mugimenduek, AHTren proiektua salatu eta haien borroka berdinean lanean dauden adiskideen askatasuna galdegingo dute arratsaldeko 19:30ean.