Udaltzaingoak abian jarri du eskola garraioa kontrolatzeko urteko lehen kanpaina

uriola.eus 2015ko mar. 20a, 10:04

Kontrolak datorren astelehenean, martxoak 23, hasi eta hilaren 29an, domeka, amaituko dira. Ekimen hori Euskadiko Bide Segurtasuneko Plan Estrategikoaren barruan dago. Horrela, Udalak aztertu nahi du zein baldintzatan egiten den ikasleen garraioa ikastetxeetaraino.

Bilboko Udaltzaingoak uriko kaleetan eskola-garraioan dabiltzan ibilgailuak kontrolatzeko eta zaintzeko kanpaina berezia hasiko du datorren astelehenean, martxoaren 23an, eta hilaren 29an, igandea, bukatuko da. Kanpaina hori Euskadiko Bide Segurtasuneko Plan Estrategikoaren barruan dago.

Ekimen horren bidez, aztertu nahi da ikasleen garraioa zein baldintzatan egiten den eta Udalak baimendutako ibilbideak eta geralekuak egokiak direla ziurtatu; era berean, eskola-garraioan ari diren ibilgailuak zorrotz kontrolatu nahi dira.

Horretarako, Udaltzaingoak azterketa mota bi egingo ditu kanpainak irauten duen bitartean. Lehenengoan administrazio arloko kontrola egingo dute, alegia, ibilgailuen eta gidarien baimenak eta agiriak (gidabaimena eta alkoholemia-proba, besteak beste) eskatuko dituzte; bigarrenean arreta berezia jarriko zaie zerbitzua ematen duten autobusen ezaugarriei, eskola-umeen segurtasuna bermatze aldera. Udaltzainek arau-hausteren bat egin dela ikusten badute, salaketa jarriko dute.

Era berean, kontrolak egiten dituzten udaltzainek ziurtatuko dute eskola-garraioan dabiltzan autobusek Bilbon egiten dituzten ibilbideak eta geralekuak Udalak baimendutakoak direla.

Bilboko Udaltzaingoko Trafikoko Atalak lortzen dituen datuekin taulak egingo dira, estatistikak osatzeko; horretarako, aldez aurretik ezarritako adierazle jakin batzuetara egokituko dira.

2014an Bilboko Udaltzaingoak martxoan eta azaroan egindako kanpainetan, etzuen inongo salaketarik egin ikuskatutako autoei. Datu hau, orokorrean, Urian eskola garraioan darabilten ibilgailuen egoera onaren seinale da.