Orain arte belar, hemendik aurrera gari

Bilboko Konpartsek sekulako San Juan jaia antolatu zuten Etxebarria parkean. Txokolatea eta gainerako edariak agortzeraino. Lekeitioko Deabruek suzko ikuskizun itzela eskaini zuten, txinpartaz betea. Ehunka bilbotar bertaratu ziren sutondoan udari ongietorria ematera.

Behi esne ekologikoarekin zein soja esnearekin prestatutako txokolatea dastatzeko jendeak zintzo itxaron zuen ilara luzean, eta erre zapore apurtxo bat izan arren, errepikatu zuenik ere izan zen. Ohiko edariekin pintxoa jateko aukera ere eskaini zuten konpartsek, txistorra edota txorizo eta hanburgesa beganoak aukeran. Jendetza gose eta egarri zen atzokoan eta bizkor agortu ziren Etxebarria parkean, Bilboko balkoian, paratutako txosnan jatekoa eta edatekoa.

Eszenatoki gainean Udamuga-Coamhain folk banda jo eta ke aritu zen txiki zein handi animatzen.

22:00etan agertu ziren Lekeitioko Deabruak korrefocs eran txinpartak zabalduz. Batzuk beldurtuta urrundu ziren, beste batzuk erakarrita hurbildu zitzaizkien.

Zerura jaurtitako su artifizial artean piztu zuten udari ongietorria emateko sua. Bizkor handitu zen eta beroaren beroaz bizkor urrundu zen jendea ingurutik. Babes hesiaren barruan zeuden konpartsakideek bota zituzten sutara erretzeko jendearen paper zahar, gaitz eta kezkak. Izan zen gurariak idatzi eta bota zituenik ere.

Gauerdian araoa egin zuten konpartsakideek. Honako hau:

 

Udarari harrera kantaila

Egu bai egu honek udara dirudi

Sutzar honen bitartez hala alunbra bedi

Goazen palza ta parkeetara arratsian

Etorriko garela bihar goizian

Goazen Etxebarriako sutzarrera

Bai sutzarrera eta han egotera.

 

Bilboko iturrietan dago ura berde

Amuarraintxo freskuak hantxe dirade

Eman bai eskuak eta gero musua

Udarako iturriaren freskua

Lizarraren ondoan ospatu

Daigun uda dela batu

Sorginak dantzan dabiltza

Dabiltza baia dabiltza

Udaran bai pozian dabiltza.

 

Orain arte belar, hemendik aurrera gari!