uriola.eus

Aitziber Olabarrieta: "Euskara sustatu behar dugu, kalera atera eta Berbaguneak horri erantzuten dio"

  Euskara  Bilbo

Berbagunearen laugarren edizioa ospatzen ari dira gaur Azkuna Zentroan eta 1.600 lagun ingururen parte-hartzea espero da. Euskara kalera atera eta eguneroko bizimoduan gure hizkuntza erabiltzeak duen garrantzia aitortzea da euskaldunen arteko bilgune honen helburu nagusia Aitziber Olabarrieta ekimeneko koordinatzailearen esanetan.

Udalak eta Bizkaiko Foru Aldundiak euskararen kaleko erabilera sustatzeko, Bilboko euskaltegien sarearekin batera abiarazi zuten Berbagunea, kontsolidatuz doa apurka-apurka Bilboko kultur jardueren egutegiaren barruan. Honela, gaur, urtarrilak 21, euskaldunen arteko bilgune honen laugarren edizioa antolatu dute Azkuna Zentroan, euskara kalera atera eta hizkuntzaren erabilera sustatzen jarraitzeko asmoz. 

Euskara euskaraz partekatzea da Euskara eta Hezkuntza Sailak, Bizkaiko Foru Aldundiko Euskararen Zuzendaritza Nagusiak eta Bilboko euskaltegien sareak laugarren urtez deitu duten Berbagunearen asmo nagusia, eta aurten, abenduko Euskararen Nazioarteko Egunean zabaldutako mezu instituzionalarekin bat eginez, euskaldun berrien ahalegin eta ekarpena aitortu eta gure hizkuntzaren etorkizuna bermatzeko duten garrantzia aldarrikatuko du.

Berbagunearen laugarren edizio honetako erronka, berriz ere, euskara kalera ateratzea da eta euskaldunek zenbait gairi buruz euskaraz aritzea; hau da, besteak beste, liburuei, kirolari, aisiari buruz euskarazberba egitea; eta horrela Bilbon euskararen erabilerari bultzada ematea.

Era askotako euskaldunak elkarrekin

Berbaguneak euskaraz ulertzeko eta berba egiteko gai diren pertsonak bildu ditu, kezka bera duten pertsonekin hizketan. Horretarako, euskaldunak eta euskara ikasten ari direnak mahai berean jarri dira 09:30etan. Hala ere, hitzorduak 18:00etara bitartean iraungo du.

Jarduera egun osoan izango da Azkuna Zentroko atrioan, baina txandaka, eta guztira, 1.600 pertsona inguruk parte hartuko dute, lau txandatan banatuta. Lehenego txanda 09:30etatik 11:00etara izan da, bigarrena 11:00etatik 12:30etara, hirugarrena 12:30etatik 14:00etara eta laugarrena 16:30etatik 18:00etara.

Txanda bakoitzean hainbat talde antolatu dira. Talde bakoitzean sei pertsona egongo dira eta aurretik jarritako gai bati buruz hitz egingo dute. Hogei minutu iraganda, egondako mahaitik altxatu eta beste mahai batera joango dira parte hartzaileak, hain zuzen ere, beste gai bati buruz hitz egiteko. Txanda bakoitzeanbirritan aldatuko dira mahai batetik beste batera parte-hartzaileak; hau da, hiru mintzagai izango dira. Horretarako, parte-hartzaile bakoitzari lantzeko gaiak jasotzen dituen triptiko bat banatuko zaio.

Mahai guztietan pertsona bana dago gaia proposatzeko eta mahaiko kideen elkarrizketan moderatzaile-lana egiten. Aurten Mikel Martinezen, Patxo Telleriaren, Miren Agur Meaberen, Juanra Madariagaren, Oihan Vegaren… presentzia nabarmentzekoa da.

Ekitaldia erakargarria izateko kultura, gizarte, ekonomia, kirol eta politika-arloko zenbait pertsonak ere parte hartu dute Berbagunean eta herritarrekin mahai berean egongo dira euskara ageriagoan uzteko hirian.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa