Mikel Alvarez Alkatetzaren, Garapen Ekonomikoaren eta Gobernu Onaren zinegotzi koordinatzaileak azaldu duenez Udalak sei urtean alderreskan egin den azterlanaren helburua datuak aztertzea eta euren bilakaera ikustea da, aurreko txostenetan lortutakoekin alderatuta. Lan zehatza, talde politiko guztiek parte hartuta egin dena eta, emaitzen arabera, Udal politikak hobetzeko era eskainiko diguna.
Deustu Fundazioko ikerketa-taldeak, Jon Leonardo Aurtenetxe Soziologiako katedradunaren zuzendaritzapean egindako lana Udalaren web orrian kontsultatu daiteke. Bilbon erroldatutako 16 urtetik gorakoei egin zaizkien 1.200 inkestetan dago oinarrituta. Gaiak, berriz, honakoak: satisfazioa ekipamenduekin, herritarren segurtasunarekin, garraioarekin eta irisgarritasunarekin, Udalaren gestioarekin, birziklatzearekin edota etxebizitzekin, besteak beste.
Optimismoa Bilbon
Bilboren behatoki osoaren ondoriorik nabariena zera da, herritarrek auzoetako eta hiriko bizitzaren kalitateari buruz duten pertzepzio ona, krisia gorabehera. 2009-2015eko azterlana eginda, ikusten da pertzepzio horrek iraun duela, hala erakusten baitute datuek.
Oraingo honetan nobedade moduan 'Bilbori buruzko irudia' sartu da galderen artean, hau da, "ea uri erakargarria den, igualitarioa ala desigualitarioa, sortzailea…". Arlo honetan ere pertzepzio optimista dute bilbotarrek, 7 puntutik gorako nota eman diote eta.
Alderatutako dimentsio guztietatik, 'lokala-globala' binomioan bakarrik agertzen da nolabaiteko anbibalentzia; izan ere, biztanleriaren sektore batek uste baitu Bilbo kanporantz proiektatutako hiria dela, baina beste sektore baten iritziz, ostera, Bilbok ez du galdu bere hurbileko eta bertako izaera, hau da, bere ezaugarria den nortasun lokala.
Irisgarritasuna eta garraio publikoa
Hautemandako bizimoduaren kalitatearen osagaiak aztertuta, alde batetik, satisfazio-maila handia dago Bilboko dotazioetako eta zerbitzuetako irisgarritasunarekin. Ildo honetan, barruti guztiek balorazio osa ona egin dute horretaz. Segurtasunari buruzko pertzepzioa ere oso ona da.
Irisgarritasunari eta garraio publikoari dagokienez, Bilbon oinez edo garraio publikoa erabilita egin ohi dira joan-etorri gehienak. Garraio publiko hori eta edukiontziak dira herritarrek gehien baloratzen dituzten dimentsioak, lehen mailako aktibo izanik.
Gero eta gehiago erabiltzen da garraio publikoa erosketak egitera joateko eta, horrek, sendotu egiten du uriko merkataritza (garraio publikoaren erabilerak % 22,9 egin du gora).
Ekipamenduekin eta instalazioekin jarraituta, garraio publikoaren ostean, berriz, kaleen garbitasuna, txukuntasuna eta lasaitasuna, berdeguneak, osasun-zentroak, ikastetxeak…
Puntuaziorik txikiena lortu duten arloak: aparkatzeko leku gutxi egotea, trafikoa eta zaratak, baita goiko auzoetako orografia dela-eta, baliabide mekanizatuak erabili beharra ere.
Bilbo segurua
Herritarren pertzepzioaren arabera, segurtasun handia dago hirian. Barruti guztietan puntuazioa 6tik gorakoa izan da. Notak bere horretan dirau 2012az geroztik.
Arazo soziala murriztu samarra da eta eremu batzuetara mugatua: Bilbo Zaharra, Iralabarri eta Zorrotza. Hala ere, txostenean onartzen denez, zaintzeari eta jagoteari buruzko iritziak gora egin du.
Bilboren nazioarteko proiekzioa
Behatokiaren emaitzetan oinarrituta, pertzepzio positibo hori ezinezkoa zitekeen bilbotarrek konfiantza betea ez balute uriaren etorkizunean. Datuek agertzen duten legetxe, egoiliar gehienek sinesten dute uriaren nazioarteko proiekzioan eta etorkizuneko proiekzioan.
Azken urteotako esperientzia arrakastatsuaren ondorioz, etorkizun itxaropentsu samarra ikusten dute; sentimendu hau erabatekoa dela esan genezake.. Biztanleen % 73,4k uste du Bilboren proiekzioak gora egingo duela aurrerantzean.
Hiriko ekipamenduei buruzkoa da txostenaren gainerakoa; kontsumo kolektiboan duten zerikusiaz eta uriko jardunean elementu dinamizatzaile moduan hartu duten garrantziaz.
Kultur instalazio onak
Arlo honetan, Euskalduna Jauregia, Guggenheim Museoa, Arriaga Antzokia, Azkuna Zentroa, Arte Ederren Museoa etab dira oraindik ere Bilboko jardunaren eragile nagusiak, aurreko txostenetako emaitzei jarraiki.
Jaietan eta herri-ekitaldietan ere gehienak dira parte hartzen dutenak. Hartara, inkestari erantzun dioten pertsonen %75ek adierazi du gustukoa duela gaur eguneko programazioa. Jai-ekitaldien zerrendan Aste Nagusia da aurrena (%71,6), San Tomasak ondoren, Aratusteak eta auzoetako jaiak.
Galdetutakoen profil soziodemografikoari dagokionez, hirian sumatzen den bizimoduaren kalitatea bat dator herritarren ikasketa-mailarekin.