Hirietako mugikortasunak eragiten duen C02aren erdia Estatuko sei hiri nagusietako ibilgailuek sortzen dute. Madril, Bartzelona, Malaga, Sevilla, Valencia eta Bilbon, hain zuzen ere. Horixe da Greenpeace erakundeak egindako El transporte en las ciudades: un motor sin freno del cambio climático txosteneko ondorio nagusietako bat.
Txosten honen bitartez, "mugikortasun eredua aldatzeko beharrizanaz" ohartaraztea du helburu erakunde ekologistak. Betiere "isurketak murrizteko". Greenpeaceren arabera, hirietan ibilgailuen erabilera %35ean jaitsiz gero, 15 urteren buruan negutegi efektu gasak erdira murriztuko lirateke.
Garraio pribatuaren ordez garraio publikoa erabiltzeko ohitura hiritarren artean zabaltzeko, udalek "funtsezko papera" dutela pentsatzen du Greenpeacek. Hori lortzea posiblea da udalek "garraio duina, kalitatezkoa, publikoa eta arrazoizkoa" eskainiz gero, "hiritarrek lanera joan-etorriak egiteko eta bizitza normaltasunez egiteko; luzaroan itxaroten egon gabe".
CO2 murrizteko mugikortasun plana duten Estatuko sei hiri nagusien rankingeko buruan daude Bartzelona eta Madril. Bilbo, aldiz, azkena da ez baitu mota horretako planik.