uriola.eus

Gontzal Fontecilla: "Eguneko plana"

  Iritzia  Bilbo

Ohitura dut hilean behin Kafe Antzokian egiten den 'Lagunartean Kantari' kantaldira joateko. Hileko azken asteazkenean, zenbait lagunekin batera, Anje Duhalde lapurtar musikariarekin aritzen gara hango eta hemengo, Iparraldeko eta Hegoaldeko, euskal kantak abesten.

Udako oporraldiaren etena luzeegia izan ez dadin, Algara konpartsak Iparralde Eguna antolatzen du Aste Nagusiko asteazkenean, eta aurten ere bertan egon gara. Iparraldeko eran eginiko bazkari ederraz gozatzeaz gain, bazkalostean Anje Duhalde eta Aire Ahizpekin ibili gara kantuan. Ikasturtean zehar abestutakoak gogoratu ditugu eta datozen saioetarako martxa hartzen hasi gara dagoeneko!

Kontua da astearte gauean lehenago erretiratu behar izan genuela etxera; izan ere, biharamuneko bazkarian itxuroso egon, eta eztarria kantaldirako prest izan behar genuen. Behingoagatik, gaueko parranda utzi, eta egunez ere ekintzez, alaitasunez eta kolorez betetako Aste Nagusia dagoela deskubritu dugu. Gautxoria banaiz ere, lagun bati aitortu diot eguneko giroa paregabea iruditu zaidala. Lagunak baiezko keinua egin du buruarekin, eta, erdi brometan, bota dit: «Aizu, nagusitzen ari gara!». Pentsakor gelditu naiz, eta, neure artean, arrazoia duela pentsatu dut. Gelditzen diren hiru gauak aprobetxatu beharko ditugu orduan, badaezpada ere. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa