Iazko lasterketak izan zuen erantzuna "sinestezina" izan zen Acambi elkarteko kideen esanetan. Bilbon, itsasadarraren inguruan, 10.000 korrikalari, kamiseta arrosa soinean zutela, biltzea lortu zuten Bularreko Minbiziaren aurkako Lasterketa solidarioan. Horri esker, guztira, 50.000 euro bideratu zituzten Mari del Mar Vivanco -CIC BioGUne- doktoreak zuzentzen duen ikerlanari jarraipena emateko.
Aurtengo hitzordua urriaren 16an izango da, igandean, Guggenheimeko zabalgunean. Hirugarren lasterketa "hobea" izango dela iragarri dute elkartekideek. "Jende gehiago" eta "diru gehiago" biltzea espero dute.
Izen-emateko epea zabalik dago Acambiren web gunean. Hori da aurtengo berrikuntzetako bat, Internet bidezko izen-ematea izango da bide bakarra "arrazoi praktikoengatik". Sei euroko balioa du. Partaideek sei euro ordaintzean kamiseta bana eskuratuko dute eta euro bateko dohaintza egingo diote Acambi elkarteari.
Korrika zein oinez egin daiteke bost kilometroko ibilbidea itsasadarrean zehar. Ostean, zumba saioa antolatu dute Guggenheimeko zabalgunera hurbiltzen diren guztientzat.
Lasterketan parte hartu ezin duenak eta elkartea diruz babestu nahi duenak aukera du bere ekarpena egiteko.
facebook.com/carreracontraelcancerdemamabilbao
