uriola.eus

Aste Nagusiko irudi izateko hautatu dituzte sei kartel finalistak

  Jaiak  Bilbo

Epaimahaikideek, gehienak diseinuaren arloko profesionalak, lehiaketara aurkeztutako 160 lanen artean sei hautatu dituzte. Irabazlea herritarren botoen bidez erabakiko da. Alde batetik, bozketa presentziala izango da eta, bestetik, udalaren webgunearen eta hedabide laguntzaileen bidez egindakoa. Bozketa horrek azken erabakiaren %66ko pisua izango du.

2017ko Aste Nagusirako atzera-kontaketa hasi da. Aste Nagusia iragarriko duen kartela aukeratzeko lehiaketako sei kartel finalistak aurkezteak "inflexio-puntua" markatzen du Itziar Urtasun Jaietako zinegotziaren esanetan, eta "herritarrei gogorarazten digu zein garrantzitsua den gure partaidetza kartel irabazlea aukeratzeko orduan". 

Epaimahaiak lan hauek aukeratu ditu: Mari eta Bali, Danon artean altxa dezagun Marijaia!, Chupa Txupi Prego, Bilboko taupadak kaleetan ozen, Todos distintos. todos iguales eta Gaupasa!. 

Guztira, 160 kartel aurkeztu dira lehiaketara, iaz baino %29 gehiago. Kartelak Bilbotik eta beste hainbat lekutatik aurkeztu dituzte, besteak beste, Bartzelonak, Valentziak, Leonek, Burgosek, Madrilek, Sevillak, Kantabriak, Lleidak, Huelvak, Gipuzkoak eta Nafarroak presentzia izan dute lehiaketan.

 

Epaimahaia

Atea itxita dutela egindako aukeraketan, epaimahaiak kontuan hartu du "kartelaren kalitate teknikoa eta lehiaketako oinarriak errespetatu izana". Kide gehienak diseinuaren arloko profesionalak dira epaimahaian; hauek dira: Jokin Aspuru, Getxophotoko zuzendaria eta komisarioa; David Abajo, diseinatzaile grafikoa; Leire Fernandez, EHUko Arte Ederretako Fakultateko irakaslea; Diego Rey, Adtoniceko zuzendaria eta Higinia Garay, diseinatzaile grafikoa. Gainera, Bilboko Udaleko Asier Abaunza eta Samir Lahdou zinegotziak, Bilboko Konpartsak federazioko ordezkari bat eta Itziar Urtasun ere epaimahaiko kideak dira.

 

Herritarren bozketa eta irabazlea

2017ko Aste Nagusiko irudi irabazlea sistema mistoaren bidez aukeratuko da; herritarren bozketak (%66ko balioa izango du) izango du pisurik handiena. Honelaxe geratuko dira aukeraketaren portzentajeak:

Bozketa presentziala (%33), Euskal Museoan, han egongo baitira erakusgai kartel finalistak irabazlea aukeratu arte. Ekainaren 19tik 23ra bitartean eman ahal izango da botoa, 10:00etatik 19:00etara astelehen, eguazten, eguen eta barikuan, eta 10:00etatik 14:00etara martitzenean, hilaren 20an. Botoa emateko NANa, gidabaimena edo antzeko egiaztagiriren bat erakutsi behar da.

Udalaren webgunearen eta hedabide laguntzaileenen bidez egindako herritarren bozketa (%33). Aurten, hauek dira hedabide horiek: ETB, Correo, Deia, Gara, Onda Vasca, Radio Bilbao, Bilbao 24 horas, El Nervión, Radio Nervión, TeleBilbao, Radio Popular, Bizkaia Irratia eta Onda Cero.

Epaimahaiaren irizpena (33%).

Irabazleak 3.000 euroko saria jasoko du eta Bilbo ordezkatuko du jaietan, abuztuaren 19tik 27ra bitartean.

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa