Bederatzi egunez Bilbo jai giroan murgilduta egongo da. Gaur hasi da Aste Nagusia. 17:00etan, konpartsek Alde Zaharreko kaleak girotzeari ekin diote eta 19:00etan, Arriagako plaza, beste urte batez, jendez lepo egon da.
Ongi Etorri Errefuxiatuak plataformako Nati Ovelleirok irakurri du pregoia txalo artean. Mezu argia zabaldu du errefuxiatu eta etorkinei harrera eginez: "Berdin da jatorria eta azala, besoak zabalik Marijaia bezala". Bukatzeko, Arriagan bildutako lagunak kantuan jarri ditu: "Senegal, Siria, Ekuador/ Nigeria, El Salvador/ Bilbon denontzat dago tokia/ ez da ilegala inor!".
Ondoren, Askapeñako konpartsakide den Ane Ortizen piztu du zuzia eta bertaratutako bilbotar zein kanpotik etorritako lagunak Marijaiarekin batera dantzan eta kantuan hasi dira.