uriola.eus

Ahotsenea Bilbon

  Kultura-aisialdia  Bilbo

Abendura bitartean Durangoko Azoka herriz herri ibiliko da, Ahotsenearen 10. urteurrena ospatu eta kulturaren plaza zabaltzeko asmoz. Erakusketa ibiltaria eta emanaldiak egongo dira, besteak beste, Bilbon gaur. Mikel Etxaburu idazleak eta Maria Rivero & Tribu Banda (Kintsukoroi) musikariek emanaldia eskainiko dute. 

Ahotsenea Bilbon
Argazkia: Durangoko Azoka | Ikusi handiago | Argazki originala

Durangoko Azokako arduradunek zabaldu dutenez, Durangoko Azokak hainbat nobedade izango ditu aurten, bere 52. edizioan. Lehen aldiz, Durangoko mugak zeharkatu eta kulturaren plaza herriz herri ibiliko da, Azokan gertatzen dena Euskal Herriko txoko ezberdinetan erakusteko asmoz eta, aldi berean, bisitariak Durangora erakartzeko helburuarekin.

Aurten Ahotseneak hamar urte betetzen dituela eta, Azokako gune hau izango da estreinaldiko bira honen protagonista nagusia. Lau geltoki izango ditu: Tafalla, Bilbo, Gasteiz eta Azpeitia, irailaren 29an hasita eta abendu hasierara arte, Durangoko Azoka hasi arte –52. edizioa abenduaren 6tik 10era arte izango da–.

Ahotseneak argazki-erakusketa bat osatu du Txelu Angoitia, Saioa Cabañas Gau Ilunak eta Joseba Barrenetxea argazkilariek urte hauetan ateratako 25 argazkirekin. Argazkiekin batera hainbat musikari, idazle, editore eta kazetariren gogoeta bana ere egongo da. Erakusketa BIBA kulturgunean urriaren 31ra egongo da ikusgai.

Erakusketaz gain, herri bakoitzean kultur emanaldi bana egongo da ikusgai. Bilbo DA! gaur, urriak 20, 20:00etan BIBA kulturgunean izango da. Bertan Mikel Etxaburu idazleak eta Maria Rivero & Tribu Banda (Kintsukoroi) musikariek emanaldia eskainiko dute. 

 

Sortzaileen guneak 10 urte

2017ko abenduan 10 urte beteko dira Ahotsenea sortu zenetik. Ahotsenea Durangoko Azokaren baitako sortzaileen gunea da, idazleek eta musikariek sortua, baina irakurleek eta entzuleek badute beren tokia.

2008. urtean, Ahotseneako kideek plazaratutako eta Aiora Renteriak irakurritako manifestuak honakoa zioen: "...Baina Azoka euskal idazle eta musikariena ba ote da? Galdera horrek eta beste hainbatek erantzuna behar dutelakoan zabaldu dugu Ahotsenea. Euskal liburu eta diskoen azokan, euskal literaturaz eta euskal musikaz berba egin gura dugu. Gutxienez, liburuek eta diskoek duten presentzia bera izan gura dugu. Stand baten atzean gure lanak sinatzeari ez deritzogu nahikoa. Irakurle eta entzuleek esateko dutena entzun gura dugu. Ahotsak eta eskuak beste behar ditugu begiak eta belarriak. Guk ere euskal kulturaren helburu estrategikoez iritzia eman eta kontuan har gaitzaten eskatzen dugu. Euskal kulturaren kudeaketaren parte izan gura dugu eta ardurak hartzeko prest gaude...".

Ahotseneak espazio bi ditu: batean sortzaileek, kazetari edota berbalaguna alboan, dagokion urtean argitaratutako lanari buruzko azalpenak eskaintzen dizkiote bertaratzen den orori; bestean, urtean plazaratutako diska zuzeneko emanaldien bitartez aurkezteko aukera eskaintzen da.

Hamar urte hauetan ehunka sortzailek izan dute aukera bere lana aurkezteko Azokan. Iaz 70 disko aurkeztu ziren zuzenean, eta 45 liburu eta disko solasaldi, emanaldi edo performanceen bidez.

 

 

2017/10/20 20:00

BIBA Bilbo

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa