uriola.eus

Errigorak zubigintzan sakontzea helburu

  Jendartea  Bilbo

Dozenaka lagun bildu dira Errigoraren kanpaina berriaren prestaketan. Lantalde handia osatzen baitute Nafarroa helgoaldeko ekoizleek, AEK-k, Ikastola Elkarteak, Sortzen Ikasbatuazek eta eurekin bat egin duten hainbat eragile sindikal eta sozialek, eta nola ez, Errigoran bolondres lanetan ari diren auzolangileek.

Iruñeko Zentral Kafe Antzokian orain arte Errigorak emandakoaren inguruko ikuspegi eta esperientzia ezberdinak mahaigaineratzeaz aparte, aurrera begirako erronkataz ere hitz egin zuten atzoko hitzorduan. Errigorak gaur arte iristeko "igaro izan dituen zubi guzti horietaz, eta aurrerantzean eraiki beharreko berrietaz". Horixe izango dute ikasturte honetan azpimarra nagusia: "Zubigintza".
 
Tertulia, Reyes Ilintxerta Euskalerria irratiko esatariak aurkeztu zuen eta hainbat parte hartze ezberdin izan ziren; Ikastola Elkarteko Koldo Tellitu, Iturri Kontserba enpresako Angel, Errigorako bolondres sareko parte den Erruki, Tuterako Argia ikastolako Argiñe, Erriberako AEK-ko Alizia, CEPAENeko ordezkari eta Lezaun upategiko Edorta, Errigorako koordinatzaile diren Ibai eta Peru...
 
Errigoraren orain arteko ibilbideari errepasotxo bat egiteaz gain, urriaren 26an hasi eta azaroaren 14an bukatuko den Nafar hegoaldeko uzta euskarari puzka kanpaina izan zuten hizpide. 

 

Zubi berriak

Aurrera begira, 2017/18ko erronken artean du Errigorak zubi berriak eraikitzea ekoizle, kontsumitzaile, kontsumo-talde, dendari, jantoki eta abarren artean, egunen batean "kanpainetatik harago merkaturatze bide berriak zabaltzeko", "ekoizpen-eremu eta ekoizpen-eredu berriak sustatzeko", "herria egin eta eraldatzen ari garen eragileen artean auzolan berriei bide egiteko", "hamaika izateko" eta "Errigoragotzeko".

 

Iazko bidea

2016/17 kurtsoan 22 ekoizle aritu ziren elkarlanean Errigoran. Bai kopuruari dagokionez eta bai inplikazioari dagokionez "gorako pausoa". Elaboratzaileen artean zein nekazari eta elaboratzaileen artean elkarlan berriak sortu ziren.

Nekazal ekoizpena ere sustatu zen. Nekazari berriak eta nekazal lur berriak bilatu eta aurkitzen jardun ziren, besteak beste. Izan ere, une batean eskaerak gainditu zituen. Ezin izan zuten eskaeren tamainako zainzuri ekologikorik bildu joan den udaberrian.

Iazko zenbakiak ez dira makalak. 14.000 saski banatu ziren, eta salmentetatik 175.000 euro eskuratu ziren euskalgintzarako. 

Nafarroa hegoaldeko euskaltzaleek "amets berriak amesteko grina" ere azaleratu zuten. Etiketatik harago adibidez, "euskararentzat espazio berriak irabazteko eta euskaltzaleok elkarlan berri eta gaurkotuak martxan jartzeko ametsak marrazteari ekin genion".

www.errigora.eus

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa