uriola.eus

“Europa Gotorlekurik ez, Giza Eskubideak ez dira negoziatzen” manifestazioa antolatu dute

  Jendartea  Bilbo

Datorren otsailaren 25ean, igandean, Ongi Etorri Errefuxiatuak elkarteak manifestazioa antolatu du. Ekintza errefuxiatuen eta migratzaileen Giza Eskubideak errespeta daitezen aldarrikatzeko, bai eta nazioarteko akordioak eta itunak bete daitezen ere, eta migrazio-politika humanoak exijitzeko erabiliko dute.

“Europa Gotorlekurik ez, Giza Eskubideak ez dira negoziatzen” manifestazioa antolatu dute
OEE artxibo irudia | Ikusi handiago | Argazki originala

Hirugarren urtez, errefuxiatu eta migratzaileei laguntzeko Euskal Herriko herri-plataformek Europako Batasuneko eta hemen inguruko beste administrazio batzuetako politikak salatuko dituzte; izan ere, “gehiago kezkatzen ditu beren mugak eta salgaiak babesteak, gerraren eta mugen negozioarekin aberasteak, giza eskubideak babesteak baino” diote.

Egoera are gehiago larriagotu da azken hilabeteetan. Mediterraneoan, Saharan, Sirian... Adingabeak desagertu egiten dira; pertsonak saldu eta erosi egiten dira; emakumeek indarkeria jasaten dute, eta sexu-esplotaziorako salduak dira…

Horrez gain, Herri-plataformek adierazi dute hemen ere, Euskal Herrian, badagoela lotsaren harresi bat, Santurtziko Portuan, hain zuzen. Salatu dute, halaber, badaudela lurralde batetik besterako bidean diren migratzaileak, eta ez-migratzaileak, kalean bizitzen.

Gauzak horrela, 25 hirik baino gehiagok eta 150 kolektibok deialdiarekin bat egin dute. Honek izango dira Hego Euskal Herrian antolatu dituzten ekintzak:

Bilbo: Bilboko Udaletxea, 12:00. Manifestazioa.

Donostia: Bakearen Usoan, 12:00. Kontzentrazioa.

Gasteiz: Gasteizko hirigunea, 13:00. Kalejira.

Iruñea: Gazteluko Plaza, 12:30. Kontzentrazioa.

2018/02/25 12:00 - 14:00

Udaletxean Bilbo

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa