Jai gunean, egunotan, hainbat eszenatoki eraikitzen ari dira. Bai bakarka, bai guneka, eszenatokiak bete egingo dira eta musika izango da gauetako benetako protagonista. Musika taldeak, erromeriak, dj-ak... denetarik egongo da su artifizialen ostean jaiarekin jarraitu nahi duenarentzako.
Lehenengo gaua ostiral honetan izango da. Jaiak hasi aurretik, Otxarkoagako Pa...Ya konpartsak, Ardoa Barrura fanfarrearekin batera, Alde Zaharreko tabernetatik poteoa antolatu du. Marijaia heldu baino lehen berotzen hasteko aukera izango da. Azken emanaldia, berriz, alboan daukaten Kaskagorri konpartsaren eskutik etorriko da, Marijaia erre baino lehen, igande horretako arratsaldean, Akerbetz taldeak emango duen kontzertuarekin.
Beraz, Aste Nagusia 2018 hasi baino lehen, eta azkenengo unera arte, gauaz eta musikaz gozatzeko aukera eskainiko dute Bilboko Konpartsek. Hemen daukazue konpartsa desberdinek atera dituzten kartelak euren programazioarekin eta kontzertuekin.