Dezepzioa, desilusioa, desengainua, ezustea, frustrazioa: horrelakoak dakartza gogora “Chichinabo Cabaret” obrak. Kabaret honetan hainbat gai aztertzen dira: utopiaren faltsutzea, ordezko errealitateak dakarren asetasun eza eta bete gabeko promesen sedimentu mikatza.
Sarkasmo eta umore finez lantzen da hori guztia, gainera.
Pabellón 6 antzerki-laborategiak Euskaldunan aurkeztuko du kabaret hori, kabaret “mental, irrizko eta japoniar bat”, zeinak ironia samurrez islatzen baitu zer-nolako arazoak dituzten gaur egungo gazteek lan-munduan sartzeko. Horretarako, langabezian dagoen gazte baten burmuinean sartuko dira, hark bere oroitzapenak eta etorkizuneko asmoak errepasatu ahala, autoestimu arrasto baten bila.
Burmuinaren barrenera egindako bidaia bat da honakoa, krisi-garaietan autoestimua berreskuratu nahian, aktore hauen guztien eskutik: Ugaitz Alegria, Irene Bau, Jon Casamayor/Koldo Olabarri, Izaskun Fernández, Quique Gago, Olatz Ganboa, Karmele Larrinaga, Iñaki Maruri, Itxaso Quintana eta Mitxel Santamarina.
Uriolak, kabareta ikusteko bi sarrera zozketatuko ditu.