uriola.eus

"Turistifikazioa" eta espazio publikoaren "merkantilizazioa" salatzeko ekintzak burutu ditu Piztu Bilbok

  Jendartea  Bilbo

'Basque Tour, Agencia Vasca de Turismo' enpresa izan da jomugetako bat, eta Areatza sinbolikoki prezintatu dute.

Piztu Bilbo mugimenduak "turistifikazioa, gentrifikazioa eta espazio publikoaren merkantilizazioa" salatzen dihardu eta, horren harira, beste bi ekintza egin berri ditu. Batetik, 'Basque Tour, Agencia Vasca de Turismo' enpresa izan dute helburu, zeinen jardunari "langileria prekarietatera kondenatzen duen lan eredua" sustatzea egotzi dioten; bestetik, espazio publikora bideratu dituzte haien aldarriak, Areatza sinbolikoki prezintatuz, "Udala hiriko espazio publikoan inposatzen ari den erabilera motak salatzeko". Era berean, instituzioak ekintza pribatuak lehenesten dituela salatu dute, izaera herrikoidun ekimenen kalterako.

Ekintzak "kapitalaren eta burgesiaren metropoliaren aurkako" kanpaina aurkezpenaren atarian gauzatu dituzte. Piztu Bilbok larunbaterako -martxoak 30- antolatu du agerpena, kalejira eran. 20:30ean emango diote hasiera Unamuno Plazatik.

Bestalde, bihar dinamika berri bat aurkeztuko da San Mameseko zelaigunearen aurrean (Luis Briñas eta Licenciado Poza gurutzatzen diren lekuan), arratsaldeko 18:00etan. Bertan, 2020an Bilbon ospatuko den Eurokopa gaitzestuko dute.

2019/03/26 18:00 - 19:00

San Mameseko zelaigunearen aurrean Bilbo

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa