Asteburu honetan ere, Loraldiak jarraitzen du. Gaur arratsaldetik igande arratsaldera bitartean zortzi ekintza programatu dituzte. Gaur, Azkuna Zentroak Belatza taldearen 'Orhi' diskoaren aurkezpena hartuko du, 20:00etan.
Larunbata ekitaldi gehien ospatuko diren eguna da, bost egongo baitira. 'Sagutxo tuntuna' umeentzako antzerkia goizez eta arratsaldez ikusi ahal izango da -11:00etan zein 17:00etan- Azkuna Zentroan. Bilborock-en, berriz, lau proposamen antolatu dira: 18:00etan Dena Bilbao kolektiboak Street Dantzeko tailerra eta erakustaldia eskainiko ditu; ondoren, 19:00etan, Sopelako institutuko 3. DBHko eta Barakaldoko Beurko institutuko Arte Batxilergo ikasleek burututako 'Kamara Sartu' proiektuaren ondorio bisualak ikusi ahal izango dira; bukatzean, 20:00etan, Euskal Herriko BeatBox Txapelketaren laugarren edizioa ospatuko da; hiru ekitaldi hauek doakoak izango dira. Bilborock-ek Aiamaren eta Aneguriaren kontzertua ere hartuko du larunbatean, 22:00etan, ordainpekoa hau -8 euroan daude sarrerak-.
Igandean, Galde Perez antzerkigileak Garazi Goia eta Goizalde Landabasoren arteko eskutitzak oholtzara igoko ditu '1362 km euri' performance literarioan. Itsas Museoan ikusi ahal izango da, goizeko 12:30ean. Arratsaldean, 19:00etan, Hibai musikagileak bigarren lan grabatua aurkeztuko du Euskalduna Jauregian, eta hogei bat partaide bilduko ditu kontzertuan.