uriola.eus

‘Non dago Mikel?’ dokumentala Bilboko zinemetara iritsiko da otsailaren 26an

  Kultura-aisialdia  Bilbo

Non dago Mikel? Amaia Merinok eta Miguel Angel LLamas ‘Pitu’-k zuzendutako dokumentala, zinematan ikusgai egongo da otsailaren 26an. 1985ean Guardia Zibilak Mikel Zabalza atxilotu ondoren, desagertu eta hilik agertu zeneko istorioa kontatzen du.

Donostiako Zinemaldiko 68. edizioan estreinatu eta "giza eskubideen urraketa beldurgarri eta errepikakorrak jasotzen dituen artxiboko irudien bidez egindako lanari esker ona adierazteko” Euskal Zinemaren Irizar Sariaren aipamen berezia jaso ondoren, Iruñeko, Donostiako, Bilboko eta Madrilgo zinema aretoetan ikusi ahal izango da Atera Films ekoiztetxe eta banatzailearen eskutik.

Dokumentalean Ion Arretxek, Mikelekin batera atxilotua izan zenetako batek, bere testigantzak eta jasandako torturen inguruko gogoetak partekatzen ditu. Horrekin batera, garaiko artxiboko materiala eta hildakoaren familiaren eta kasuarekin zerikusia duten pertsonen testigantzak biltzen ditu, hala nola, anaiak, ilobak, Garbiñe Garate Mikelen ama eta beste hainbat pertsonen testigantzak.

Helburua dokumental hau ahalik eta leku gehienetan erakutsi ahal izatea dela adierazi dute Ahotsa.infok eta Izar Filmsek, beraz, estreinatu ondoren, hainbat zinema-jaialditan aurkeztuko da, areto komertzialetan, zine-aretoetan eta herri eta hirietako zentro kulturaletan.

Sinopsia
 
1985eko azaroa. Guardia Zibilak, terrorismoaren kontrako operazio baten barrenean, Mikel Zabalza atxilotu du, autobuseko gidari gazte bat, beste pertsona batzuekin batera. Gainerako gazteak askatu dituztenean, tortura basatiak jasan izana salatu dute. Baina Mikel falta da.
 
Agintariek ihes egin duela esan duten arren, bizirik aurkitzeko esperantza ahuldu ahala, Euskal Herriko kaleetan oihu bat adituko da gero eta ozenago: "Non dago Mikel?”.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa