uriola.eus

Hainbat mobilizazio antolatu dituzte Maiatzaren Lehenean

  Jendartea  Bilbo

ELA eta LAB sindikatuek manifestazioak deitu dituzte maiatzaren 1ean, Langileen Nazioarteko Egunean. ELAk 11:30ean abiatuko du manifestazioa Jesusen Bihotzetik eta LABek, berriz, 11:00etan Zabalburutik. 

ELA eta LAB sindikatuak ez ezik, Bilboko Langile Autodefentsa Sareak ere langileen aldeko borrokarako manifestazioa deitu du “langile borrokari errepresiorik ez” lelopean. Etxebarrieta Anaien plazan 16:45ean. Horrekin batera, Kontseilu Sozialistak antolatutako mobilizazioa Eliptika plazatik abiatuko da 18:30ean.

ELAk eta LABek aldaketarako garaia dela aldarrikatu nahi dute manifestu honen bidez. Hori dela eta, “Aldaketa garaia da” eta ““Aldaketa da aukera. Por un cambio de rumbo. Zaintza, lana, bizitza, herria!” bezalako leloekin hartuko dituzte Bilboko kaleak larunbatean. 

ELAren arabera, pentsio publikoen alde egiteko eta lan erreforma indargabetzeko garaia da, “lan hitzarmenak bertan negoziatzeko aukera izateko eta enplegua suntsitu ordez salbatu dadin”.

Pandemiaren ondorioz, milaka lagunen osasuna eta egoera ekonomikoa kaltetuta geratu da, “bereziki emakumeena”. Sindikatuek lan erreformen ondoriozko enpleguaren galeraren aurrean, erakundeek langileak baztertu izana salatu dute. “etekinak lortzen dituzten enpresek jendea kaleratzen ari direlako, euren neurrira egindako legedia baliatuz”, adierazi du ELAk.

Lan erreforma indargabetzearekin batera, zerga erreforma egin beharko litzakeela uste du sindikatuak: “Halako erreformarik gabe, zorra ordaindu beharraren lehentasunak ezinbestean murrizketa gehiago ekarriko baititu”.

Garbiñe Aranburu LABeko idazkari nagusiaren arabera, eredu ekonomiko eta sozial berri bat eraikitzea ezinbestekoa da eta horretarako langileen parte-hartzea eta herri burujabetza prozesuan sakondu behar da.

Sindikatuek argi dute aldaketa bat lortzeko borrokan jarraitu behar dutela. “badakigu aldaketa horiek egi bihurtzeko presioa egiten jarraitu behar dugula bai kalean, baita lantokietan ere” azpimarratu du Mitxel Lakuntza ELAko idazkari nagusiak.

 

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa