uriola.eus

Ana Laura Alaezen erakusketa jarri dute gaur ikusgai Azkuna Zentroan

  Kultura-aisialdia  Bilbo

Irailaren 26ra arte egongo da ikusgai Azkuna Zentroan Ana Laura Alaezen “Kontzertu guztiak, gau guztiak, dena hutsik”. Artistaren azken hiru hamarkadetako lana biltzen duen eta bere "produkzioaren azterketa zabaltzen" duen erakusketa da.

Erakusketa lau multzo tematikotan banatuta dago: Objektu eta luzapen zitalak; Eszitazioa eta hutsunea; Indarkeria eta zaurgarritasuna; Mitoa, emakumearen sexualitatea eta kamuflajeko ideología. Espazio bakoitzak pieza nagusi bat aurkezten du, hainbat obra multzoz inguratua. Lan bakoitza gainerakoekin lotzen saiatzen da.

Emozioen arkitekto gisa definitzen du Alaezek bere burua, “bere bizitza eskultura bilakatzen duen norbait”. Honen bidez, aldarrikapen bat egiten du; edertasuna ez dagoela estandarizazioan, desberdintasunean baizik. Artea biziraupen-ariketa gisa hartzen du, non “egunerokotasunaren zeinuak berrirakurtzen diren eta errealitate bizigarriago baten alde jartzen diren”.

Artista 80ko hamarkadako euskal testuinguruan hezi da, “krisi sozial eta ekonomikoak, indarkeriaren gorakadak eta itxaropenik ezak markatua”. Garai horretako kulturako emakumearen ikusezintasuna zela eta, artistak bere klase, genero eta leku izaeragatik ezarritako estereotipo zurrunak zalantzan jartzen dituen irudikapenaren kritika bat garatu du.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa