Auzoz auzo kontzentratu dira berriz osasungintza duina eskatzeko

Aurreko asteazkenean egin zuten moduan herritarrak kalera atera dira. Auzoetako anbulatorioen aurrean egin dituzte elkarretaratzeak osasungintzak jasaten ari den egoera eta erakundeen aurreikuspen eza salatzeko.

Bilboko auzoen elkarteen federazioa kalera atera da berriro herritarrak eta plantillak osasungintzan jasaten ari diren egoera salatzeko. Protokoloetan egiten ari diren aldaketa eta murrizketak salatu dituzte. Izan ere haien esanetan, neurri berriek kontraesanak sortzen ari dira herritarren artean.

Bizkaiko sendagileen elkargoak aurreikusitako egoera dela aldarrikatu dute: "lehen arretaren iragarritako heriotza da". Hala ere "badirudi" erakundeek ez dituztela aurreikuspen gehiegirik egin. Bilakaerara adi egongo direla azaldu dute eta bitartean osasun publiko, presentziala eta kalitatezkoa aldarrikatzen jarraituko dute. Horretarako, igande honetan Bihotz Sakratutik 12:00etan sindikatuek deitu duten manifestaziora joatera animatu dituzte herritarrak.

(Argazkiak: Bilboko Auzo Elkarteen Federazioa)