Hiru aste baino gutxiago falta dira aurtengo inauterietarako eta ekintzaz beterik datoz 2022an ere. Kopla txikien lehiaketa bere VII. edizioa ospatuko du Kafe Antzokian. Otsailaren 19an 20:00etan izango da eta horren ostean Sutan musika taldeak kontzertua eskainiko du 10:00etan.
Izena emateko azken eguna otsailaren 14a izango da, letra entregatzeko azken egunaren berdina. Edozein taldek, konpartsa edo abesbatzak parte hartu ahal izango du, gutxienez bost kide baditu eta mozorrotuta badoaz. Letrak originalak eta argitaragabeak izan beharko dute eta doinua herrikoia edo xede horretarako sortutakoa izan daiteke.
Bigarren lehiaketa hurrengo egunean izango da, otsailaren 20an. Pontxe eta torrada lehiaketak X. urteurrena ospatuko du. Plaza berrian izango da eta edonork parte hartu dezake. Bai pontxea bai torradak etxean egin beharko dira eta 12:00-12:15 tartean aurkeztu. Ordu erdi geroago torrada nagusia izango da eta azkenik sari banaketa 14:30etan izango da.
Azken lehiaketa eta seguruenik handiena, aratusteen astean egingo da. Mozorro lehiaketa otsailaren 26ko arratsaldean ospatuko da eta konpartsa guztiak, taldeak eta norbanakoak parte hartzen duten kalejira da. Partaidetza, originaltasuna, elkarreragina eta mozorroek daukaten aratusteetako kutsua sarituko dira. Kalejira 17:00etan hasiko da Diputazio aurrean eta plaza zirkularrean bukatuko da. Izen ematea otsailaren 19a baino lehen egin beharko da edo egunean bertan 16:00etatik 16:30etara.
Izena emateko
Hiru lehiaketetarako izena emateko edo informazio gehiagorako Bilboko konpartsetako bulegoko zenbakira (946791306) deitu daiteke 10:00etatik 13:00etara edo bulegoa@bilbokokonpartsak.eus helbidera idatzi. Kopla txikien lehiaketaren kasuan, Bizkaiko Abesbatzen elkartearekin kontaktuan jartzeko aukera dago 944244045 telefonoaren bitartez edo baekoralak@hotmail.com helbidearen bitartez.