Bertso Errondak baditu bere lehenengo hiru finalistak

uriola.eus 2022ko mar. 2a, 11:09
Deskargatu Info Ahotsak :

Bertso Errondaren lehen saioa (Irudia: Adaxka taberna)

Zirika espazioan izan zen hirugarren kanporaketa eta jada txapelketaren erdia baino gehiago igaro da. Josu Ibarguren, Paule Loizaga eta Julene Iturbe pasa dira zuzenean finalera. 

Bertso Errondak orotariko bertso eta partaideak utzi dizkigu jada. Atzo, Zirika espazioan hirugarren saioa ospatu zen eta beste bi besterik ez dira geratzen. Hiru egunetan zehar hurbildutako publikoak, gazte bertsolarien errimaz gozatzeko aukera izan dute aspaldiko partez. Izan ere, 2020an erdixka geratu zen pandemiaren ondorioz eta aurreko urtean ezin izan zen egin. 

Lehen saioa Adaxkan ospatu zen eta Enare Muniategi, Ander Ucelay, Eire Salegi eta Josu Ibargurenen txanda izan zen. Taberna jendez gainezka, bertsolarien sormena berriz entzuteko gogoa zegoen. Lau partaideak ez zioten publikoari huts egin eta esaldi interesgarriak utzi zituzten.

Barreak eta giro ona nagusitu ziren; horiekin batera, Josu Ibarguren atera zen garaile lehen saio horretan. Ikasten duen medikuntza karreran eta bere trebetasun sozialak jarri zituen hasierako agurraren erdigunean. 

"Beti buklean entzuten du
Su ta Garren en jo ta ke,
nahiz karrera amaitzeko
falta 4 eternitate
gehiago geratzen zaio
bizarra atera arte"
 
"Oiartzundik Adaxkara
tipo hau arraroa da
adarretik joateko
iritsi da Adaxkara"
 
Bigarren saioa hurrengo ostegunean egin zen Erronda kultur elkartean. Iñauterietarako prestatua zegoen jada taberna eta Ander Anakabe, Paule Loizaga eta Iruri Altzerka bertsolariak honetara moldatu behar izan zuten. Kobazuloetan girotutako apaingarriez laguntzeko, harriketarren irudi bat jarri zuten telebistan eta partaideak buruan hezur bat zutela abestu zuten. Oraingoan, Paule Loizaga lortu zuen finalera sailkatzea, txalo zaparraden artean. 
Hirugarren txanda atzo bertan izan zen Xirika espazioan. Aurreko bi egunetan moduan beterik zegoen lekua eta txalotzeko gogoak ere beraiekin eraman zituzten. Asier Alcedo, Jon Elortza, Haizea Telleria eta Julene Iturbek parte hartu zuten eta azken honek lortu zuen garaipena. 
Ekuatorea igaro du Bertso Errondak baina oraindik bi saio falta dira finalera heltzeko. Datorren asteartean Bira kultur gunean ibiliko dira Maddi Askaiturrieta, Unai Mendiburu, Mikel Alartxaguena eta Hodei Munduate. Azkenik, La Villa tabernan Janire Arrizabalaga, Kerman Diaz, Aritz Landeta eta Igor Galartza izango dira martxoaren 16an. 
 

Kultura