Apurka-apurka uda hurbiltzen ari da eta horregatik Udalak, oporretako udalekuen berri eman du. Urtero bezala bost programa prestatu ditu: eguneko udalekuak, goizekoak, Udan primeran kirola eginez, Kirol Campusak eta musika-udalekuak. Guztira 6.070 ume izango dute aukera horietara joateko.
Izena emateko epea zabalduko duten lehenak eguneko eta goizeko udalekuak izango dira. Apirilaren 29tik, maiatzaren 3ra 2010 eta 2018 bitartean jaiotakoak eman ahalko dute izena. 1.520 plaza eguneko udalekuetarako izango dira eta 485 egoera zaurgarrian dauden familientzako gordeko dira. Ekainaren 27tik abuztuaren 8ra eta abuztuaren 29tik irailaren 2ra egingo dira eta 9:30etik 16:00etara izango dira. Asteko prezioa 54,65 eurokoa da, 41 eurokoa familia ugarientzat eta 13,65 eurokoa diru-sarrerak bermatzeko errenta eta/edo bizitzako gutxieneko diru-sarrera jasotzen duten familientzat.
Goizeko udalekuen kasuan, ekainaren 27tik uztailaren 29ra egingo dira 9:30etik 13:00etara. Asteko prezioa 16,40 eurokoa da eta 12,30 eurokoa familia ugarientzat eta diru-sarrerak Bermatzeko errenta eta/edo bizitzako gutxieneko diru-sarrera jasotzen duten familientzat. Bi udalekuetarako izena 944010010 telefonoan edo www.bilbao.eus webgunean eman daiteke. Plazak zozketa bidez esleituko dira maiatzaren 4an eta inskripizoa 8an eta 9an egin beharko da.
Kirol udalekuak
Bilbao Kirolak-en bitartez "Udan Primeran Kirola Eginez" programa abiatuko da. Honek 2.285 plaza izango ditu 6 eta 13 urte arteko gazteentzat. Badminton, saskibaloia, areto-futbola, areto jockeya, uretako jokoak edo aretoko beste joko batzuk egiteko aukera izango dute. Ekainaren 22tik abuztuaren 5era eta abuztuaren 29tik irailaren 2ra egingo da 9:00etatik 14:00etara. Maiatzaren tik aurrera Bilbao Kirolak-en abonatuek eman ahalko dute izena eta maiatzaren 9tik aurrera ez abonatuek. Kasu honetan, plazak erreserba-ordenaren arabera esleituko dira.
Prezioa, abonatuentzat, asteko 52 euro izango da, eta abonatu ez direnentzat, 62,50 euro. Jaiegunak dituzten asteetan, egun kopuruaren araberakoa izango da kostua. Izen ematea Bilbao Kirolak-en webgunean, helbidean eta kiroldegietako salmenta-makinetan egin ahalko da eta 30 plaza dibertsitate funtzionala duten adingabeentzat izango dira. Hauek Gaituzport helbidean edo 622 022 063 telefonora deituz egingo da.
Kirolerako beste aukera, Campusak izango dira. 320 plaza izango dira 6-18 urte bitartekoentzat gimnasia erritmikoa, artistikoa, rokodromoa edo erraketa-kirolak egiteko. Kasu honetan, asteko kostua 77,75 eurokoa da abonatuentzat eta 185,75 eurokoa abonatuak ez direnentzat. Jaiegunak dituzten asteetan, egun kopuruaren araberakoa izango da kostua.
Musika udalekuak
Bilbao Musikaren bitartez 360 plazako musika-udalekuak antolatuko dira 4 eta 12 urte bitarteko haurrentzat. Hiru txandatan egingo dira ekainaren 27tik uztailaren 8ra, uztailaren 11tik 15era eta uztailaren 18tik 22ra eta bi ordutegi aukeratu ahal izango dira: 8:30etik 13:30era edo 9:30etik 13:30era.
Arte plastikoak, sormena, musika, kantua, dantza, arte eszenikoak, antzerkia eta jolas-jarduerak. Izena emateko epea maiatzaren 2an hasi eta maiatzaren 13ko 14:00etan amaituko da. Bilbao Musikaren egoitzan edo web-orria erabiliz (www.bilbamusika.eus) eman daiteke izena eta onartutakoen zerrenda maiatzaren 17an argitaratuko da.
Ekintza guztien eta programa guztien xehetasun guztiak Bilboko Udalaren web orrian eskura daiteke.