"Gerraren jauntxoak" batzen dituen NATOren aurka

Maite Txintxurreta Agirregabiria 2022ko eka. 29a, 13:12
Deskargatu Info Ahotsak :

Ipar Atlantikoko Itunaren Erakundea urteko batzarra hasi da gaur Madrilen. Horren aurrean, Kakitzat Koordinadora Antimilitaristak elkarretaratzea egin du Espainiako Gobernuaren Bizkaiko Azpiordezkaritzaren aurrean. Gastu militarra bestelako beharrizanetara bideratzeko eskatu dute bertan, hala nola hezkuntzara edota osasungintzara.

Ehorzle eta eskeleto jantziak soinean irudikatu nahi izan dute NATOk gerra, heriotza eta sufrimendua baino ez dakarrela. Era berean, gogorarazi dute duela 36 urte Hego Euskal Herriko biztanleek erreferendumean ezezkoa eman ziotela erakunde horri, eta herritarren borondateari jaramon egiteko eskatu dute.

“NATOko estatu guztiek babesa eta kontzientzia-eragozpenerako eskubide unibertsala ukatzen diete borrokatzeari uko egiten dioten bi aldeetako milaka gizonei, gatazka-eremura armak bidaltzen eta aurrekontu militarra handitzen duten bitartean, gatazka gogortuz”, adierazi du Kakitzaten bozeramale gisa jardun duen Josune Rojasek. Besteak beste, Ukrainako gerrarekin horixe gertatzen ari dela azpimarratu du taldeak. Hala,  Errusiaren inbasioa bertan behera lagatzea eta NATOk tropak eta armak bidaltzeari uztea eskatu dute, gastu militarraren igoera eta arma fabrikei emandako diru-laguntzak salatu eta paradisu fiskalak desegiteko galdegiteaz gain, zeintzuetan oligarkia europarrek eta armamentu industriek etekinak zuritzen dituzten.

Horren guztiaren aurrean, justizia sozialaren alde lerratu dira, nabarmendu dutelarik ez direla neutralak afera honetan, eta zera argi diotela: “NATOri ez”.

KEM-MOC, Madrilen

Ildo beretik, atzo, hilak 28, Bilboko KEM-MOC talde antimilitaristako zenbait kide Madrilen egon ziren, Gerra Eskolan protesta ekintza bat gauzatzen estatuko hainbat txokotatik bertaratutako militanteekin batera. Ekintza zuzen ez-biolento horretan, margoketak egin zituzten, pankartak zabaltzearekin eta abestiak kantatzearekin bat. Hala, NATOko goi-bileraren bezperan, “gerraren jaunak” bidaltzeko eta Gerraren Eskola Bakearen Eskola bihurtzeko aldarrikapena plazaratu zuten umeen amantalak soinean jantzita. Ondorioz, ia 30 pertsona atxilo eraman zituzten komisaldegira.

Gizartea