Bilboko Udalaren Euskara eta Hezkuntza Sailak eta Bizkaiko Foru Aldundiaren Euskara Zuzendaritza Nagusiak bultzatuta, badator Bilboko IX. Berbagunea. Antolatzaileek gogorarazi dute aurreko edizioak benetan arrakastatsuak izan direla, horietako bakoitzak 1.200 bat lagun bildu dituelarik. Bada, aurten ere hori errepikatzeko asmoa dute: “Erronka euskararen erabilera kalera ateratzea izango da, euskaldunak eta euskara ikasten ari direnak elkarrekin euskaraz berbetan jarrita”.
Euskara ikasleei ez ezik, hizkuntza horretan lagunartean solasteko gogoa duen edonori zuzenduta dago Berbagunea. Hala, euskaraz ulertzeko gaitasuna izatea da bete beharreko baldintza bakarra, euskaldunak eta euskaldun hartzaileak batu nahi dituzte eta. Hala, parte hartu nahi dutenek esteka honetan eman dezakete izena.
Jon Gomez aurkezle eta musikari galdakoztarra arituko da aurtengo edizioan gidari lanetan, eta, beraz gain, solaskide gisa parte hartzera jende ezaguna ere hurbilduko da: politikariak, kultura munduko pertsonak…
Hainbat txanda
Egunean zehar lau txanda antolatuko dira. Lehenengo txanda 09:30 – 10:30; bigarren txanda, 11:00 – 12:00; hirugarren txanda, 12:30 – 13:30 eta laugarren txanda, arratsaldean , 17:00 - 18:00. Horietako bakoitzean 360 lagunentzako tokia egongo da.
Laupabost pertsonako taldeetan banatuko dituzte txanda bakoitzeko partaideak, eta mahaiaren bueltan jarriko dituzte, ordubete pasatxoko tartean bi mahai mugimendu egingo dituztelarik, 20 minutuan behin. Mahai bakoitzean gai baten inguruan jardungo dute, eta mahaikide bakoitzak hiruorriko bat izango du, jorratu beharreko gaiak zeintzuk diren dioena. Mahai bakoitzak, gainera, elkarrizketa dinamizatzeko rola izango duen moderatzaile bat izango du.
