1980tik ospatzen den euskararen aldeko ekimen handiak aurten 23. edizioa izan du, eta lehenengo aldiz kalkulatu nahi izan da zenbaterainoko karbono-aztarna uzten duen. Kalkulu hauen helburu nagusia etorkizuneko edizioetan emisioak murrizteko neurriak identifikatzea da, ekitaldia ahalik eta jasangarriena izan dadin.
KORRIKA, euskararen aldeko lasterketa herrikoi handiena, bere ingurumen-inpaktua neurtu du aurrenekoz, ISO 14067 araua oinarri hartuta. Lander Crespo klima-adituak egindako azterketaren arabera, KORRIKAren isurien %69 inguru garraioarekin lotuta egon zen azken edizioan, eta amaiera-egunean bertan garraioak izan zuen inpaktu handiena, isurien %74 sortuz.
Azterketak,ondorioztatu du salmenta-produktuek (arropa, adibidez) isurien %19 sortu zutela. Gainerako ekintzetan (argiztapena, azpiegiturak eta bestelako antolakuntza-elementuak) isuriak ez dira hain nabarmenak izan. Ikusita amaiera-ekitaldira joateko mugikortasuna dela isurketen iturri nagusia, Cresporen ikerketa gomendatzen du garraio-aukerak optimizatzeko eta produktuen ekoizpen-prozesuak hobeto kontrolatzeko. Era berean, datu-bilketa hobetzea gomendatzen du, etorkizuneko ingurumen-kalkuluak zehatzagoak izan daitezen.
Ane Elordik, KORRIKAko arduradun nagusiak, azpimarratu du euskararen aldeko ekitaldi honen helburua ez ezik, ingurumenarekiko konpromisoa ere ezinbestekoa dela: "izan daitezela euskararen oihartzuna, hanka nekatuak eta oroitzapen gozoak KORRIKAren aztarna bakarra!”
Ikerketak ondorioztatu du KORRIKA beste ekitaldi handiekin alderatuz, hala nola New Yorkeko eta Madrilgo maratoiekin, karbono-aztarna mailan nahiko baxua dela, nahiz eta parte-hartzaile kopurua oso handia izan.
Txosten osoa eta aurreko ikerketak kontsultagai daude KORRIKAren webgunean: www.korrika.eus/eu/korrika/ikerketak.