Pauso hau ematea garrantzitsua izan da, ulertzen genuelako saretze honek auzoetako talde feministak indartuko zituela eta, aldi berean, Bilboko problematikari modu bateratuan erantzuteko tresna baliagarria izango zela. Horregatik, azken urte honetan, sarearen izaera zehazten aritu gara eta helburu amankomunak ezarri ditugu.
Argi daukagu Bilbo hiri globalizatua dela, eta sistema zisheteropatriarkalaren mesedetan funtzionatzen duela. Horren aurrean, beharrezkotzat jotzen dugu erantzun feminista kolektibo bat ematea. Hortik gure lelo orokorra: "Gazte feministok, Bilbo feminista eraiki!"
Aurtengo helburua saretze hau indartzea da, eta kurtsoan geratzen diren azken hilabete hauetan kanpora begirako ekintza desberdinak plazaratuko ditugu. Hala ere, gure helburu nagusiak epe ertainera eta luzera begira daude, eta badakigu Bilbo feminista bat eraikitzea lan handia dela. Bide horretan jarraitzeko prest gaude, indarrez eta energiaz beteta gatozelako.
Bide batez, Bilboko gazte feminista orori dei egiten diegu feminismoan antola daitezen eta gurekin batera bidea egin dezaten!