Bilboko Udalak antolatutako Bidaiarien Txokoa-Rincón de la Gente Viajera ekimena Begoñako eta Santutxuko udaltegietara iritsiko da martxoaren 27tik apirilaren 5era. Hitzaldi, dokumental eta erakusketa ugariren bidez, bidaiarien esperientziak eta bidaien ikuspegi desberdinak jendeari hurbiltzea du helburu.
Programak hainbat jarduera eskaintzen ditu, tartean Roberto Moso eta Roge Blasco bidaia-programen aurkezle ezagunekin solasaldiak, Hego Amerikako euskaldunen urratsak jarraitu dituzten Maialen Lopez eta Iñaki Goikoetxearen kronikak, eta Pedro Alonsok bizikletaz bidaiatzeari buruzko aholku praktikoak. Mendi Film Festival jaialdiko dokumental onenak ere ikusgai egongo dira, besteak beste, Jaime film laburra, 2024ko saria irabazi zuena.
Erakusketen artean, "Latidos de la Tierra: Viajes a los volcanes en la literatura" eta Leonor Uriartek egindako "Dibujando silencios" nabarmentzen dira. Gainera, Begoña Santos idazlearen "Mujeres que mueven montañas" liburuaren aurkezpena eta Iñaki Hernaizen tango kontzertua egongo dira. Haurrentzako ipuin kontalari saioa ere antolatuko da, Itziar Saenz de Ojerren eskutik.
Jarduerak sarrera librekoak dira edukiera bete arte, Begoñako liburutegian egiten diren bi erakusketak izan ezik, horietarako izena eman beharko baita.