GUKA Bilboko euskaltzaleen plaza askeak hirian martxan den erdalduntze makinaren dinamika abiatu zuen duela hilabete bat, zeinak Bilboko euskaldunek euskaraz bizitzeko dituzten trabak islatzen dituen. Hori dela eta, agerraldia egin zuten atzo, hilaren 2an, oztopo horiek salatzeko eta egoera horri aurre egiteko deia egiteko.
Plaza Berrian egin zuten ekintzaren bidez hiriaren funtzionamendua erdarazkoa dela nabarmendu dute hainbat arlotan: aisialdi eta kultur eskaintzak, haur eta gazteentzako hezkuntza ez formalak, kirolak, ostalaritzak, hedabideek eta merkataritza zein enpresa munduak…. Hauek guztiak “makinaren erdal-engranajea” osatzen dutela adierazi dute makina irudikatu zuten euskaltzaleek.
24 orduz martxan dabilen makina honek erdaldunak sortzen dituela salatu dute: “Euskaraz bizi nahi duten herritarrentzat bizitzako funtzio ezberdinak euskaraz garatu ahal izatea ezinezko egiten du”. Kanpaina honen bitartez, gizartea erdalduntzeko dauden mekanismo eta mugimenduak agerian jarri ditu GUKAk, izan ere, azpimarratu dute askotan oharkabean pasatzen direla. Horregatik, korronte, ohitura eta erabaki horiek bistaratu nahi izan dituzte, herritarren kontzientzian eta erantzunean eragiteko asmoz.
Erdalduntze makina horren aurrean, euskaltzale komunitatea euskaraz bizi eta makina trabatzera deitu du GUKAk. “Bilbo euskaldunago bat eraikitzeko ardura partekatua da”, zehaztu dute, eta euskara eta euskaldunen komunitatearen aurkako oldarraldi judizial, mediatiko eta ideologikoaren aurrean, mugimendu euskaltzalea ez dela geldi egongo gogorarazi dute. "Erdalduntze makina martxan da Bilbon, eta berau gelditzera gatoz", gehitu dute.