Hamabi egun falta dira Marijaia Arriaga antzokiko balkoian berriro ere agurtzeko, eta hainbat jardueraz betetako programazioaz gozatzeko. Umeentzako jarduerak, arte eta sukaldaritza tailerrak, puzgarriak, txotxongilo eta pailazoak, goitibera, txosnak eraikitzeko tailerrak… antolatu dituzte.
Gaur goizean Arriaga Plazan egindako aurkezpenean Aste Nagusiko programazioaren xehetasunen berri eman du Bilboko Konpartsen Federazioak. Aurten, 600 jarduera baino gehiago prestatu dituzte konpartsen, Federazioaren eta Jai Batzorde Mistoaren artean. Ekintza guztiak Federazioak egindako programazio liburuxkan bildu dituzte eta jada 15.000 kopia inprimatu dituzte bilbotarren artean banatzeko. Gainera, iaz martxan jarritako web aplikazioan ere izango dira ekintza guztiak, beste kontu garrantzitsu batzuekin batera: AstenagusiPedia, txosnen mapa, programazioa egunez egun eta erasoen aurkako protokoloak. Hona hemen web APPerako esteka: app.bilbokokonpartsak.eus.
Horrez gain, aurtengo Aste Nagusirako, webgune berria ere prestatu dute, astenagusia.bilbokokonpartsak.eus helbidean, jai astean zehar soilik funtzionatuko duena, egun berezi horietarako infomazio garrantzitsu guztia eskura izateko.
Gustu guztientzako ekintzak
Kirola protagonista nagusietako bat izango da. Uretan, aldapan, plazan eta txosnetan gorputza mugitzeko ekintzak izango dituzte kirolariek: xake lehiaketa, swing dantza tailerrak, piraguak, konpartsen arteko ur jolasak, waterpolo, rubik lehiaketa, igel-toka… Ume zein helduentzako saskibaloi lehiaketa asteazkenean, hilak 20, izango da Arriaga plazan, eta Hiri Krosa ostiralean.
Urtero bezala, lehiaketa gastronomikoa egunero egingo dute Areatzan. Munduko platera, aurten, arroza izango da, eta lehen domekan lehiatuko da, 17an. Beste berritasuna bigarren domekak hartuko du: buztan gisatu lehiaketa itzuliko da.
Azken urteetan nobedade arrakastatsu izan diren skate tailerra, txalaparta tailer-emanaldia eta rap tailer-emanaldia errepikatu dituzte gazteentzat Arriaga plazan. Rap tailer-emanaldia rapero eta bertsolariekin batera izango da.
Bestalde, programazio musikalak ia 250 kontzertu bildu ditu, horien artean, Naxker, Ksus Belly, Chulería Joder, Ezpalak, Ziztada & Erlantz, Kaparrak eta Bengo. Horiez gain, musika estilo eta giro anitzeko DJak eta pintxadak ere egongo dira txosnetan, konpartsek eta guneek antolatuta.
“Txosnak. Gureak, danonak”
Nobedade gisa, aurtengo txosna guztien diseinuek “Txosnak. Gureak, danonak” kanpainari atxikimendua islatuko diote. “Geure, guztion, txosnak munduan bakarrak dira, gureontzat goxo kozinatzen dugunon sukaldeak, iraultzaileon barrak, mundu berri batekin amesten dugunon etxeak”, aldarirkatu du Eire Larreak, eta horiek babesteko kanpaina, aurtengo Aste Nagusiko txosnaguneko protagonista izango da.