Filmaren ondoren, 'Haurrak eta dispertsioa' gaiari buruzko solasaldia antolatu dute. Hizlari arituko dira Joseba Martin (filmaren ekoizpen laguntzailea), Mari Luz Esteban (antropologoa) eta Jone Urionaguena (psikologoa).
Giza balioetan oinarritzen den hirugarren film pedagokikoa ekoitzi du Kurkuluxetan elkarteak. Kubako umeekin batera ekoitzi zuten Keinuka mugaz gaindi (2014) eta Venezuelakoekin batera Dena ez da futbola (2015). Hirugarrena Motxilaren umea izenekoa da (2017).
Bere etxetik 700 kilometrora dagoen kartzela batean ama preso duen hamaika urteko haurraren istorioa da. 22 minutuko ikus-entzunezko lana. “Gertaera errealetan oinarritutako fikzioa da”, Rita Naveira zuzendariak dioenez. Filman zehar umearen egoera azaltzen da, bai ikasgelan, bai kartzelarako joan-etorrietan, bai vis a vis bisitetan. Une horietan motxilak garrantzia berezia du, “bizitza hartzen du”, Naveiraren hitzetan.
“Pil-pilean” dagoen gaia jorratzen du Motxilaren umea-k, “hurbileko gaia”, baina orain arte pelikuetan landu ez dena. “Gurasoen afektibitatea jasotzeko eta gurasoek heziak izateko haurrek duten eskubideak” azpimarratzen ditu. “Ehunka euskal umeri ukatutako eskubideak” direlako. Filmak eskubide horien aldeko aldarria zabaldu nahi du “beste begirada bat” erantsiz, “umeen ikuspegia”.
Bilbon, Diman eta Segoviako espetxe zaharrean grabatu du Rita Naveira zuzendariaren lantaldeak. Aktore ia denak amauteurrak dira. Itziar Ituiño aktore profesionala salbu.
Euskaraz grabatu dute jatorrizko bertsioa, eta ikusgai dago jada gaztelaniaz (La niña de la mochila) eta inglesezezko (The backpack child) azpitituluekin ere. "Hurrengo egunetan" frantsesez eta katalanezko azpitituluekin ikusgai jarriko dute.
Kurkuluxetan elkarteko lagunen helburua filma “jende askorengana” zabaltzea da. Irakaskuntzan, kulturgintzan zein sindikalgintzan erabiltzea.
umegunea@gmail.com