Udan etenik ez Pabelloi 6 aretoko programazioan

Uztailean amaituko dute 2021-2022 denboraldia eta atseden egun batzuk hartu ostean, El trepa de Palacio antzerkia aurkeztuko dute abuztuan, 2022-23 denboraldiari hasiera ematearekin batera.

Abenduaren 17an eta 18an Arriaga Antzokian aurkeztu zuten Ramon Maria del Valle-Inclánen antzerki klasikoa, Luces de bohemia, taularatu dute berriz azken hilabete honetan, izan ere, taldea Villanova de Arousan (Galizia) izan da Valle-Inclán antzerki jaialdian parte hartzen. Galiziako emanaldiaren ondoren, antzezlana Pabelloi 6n antzeztu dute baita ere, uztailaren 21etik 25era bitartean hain zuzen.

Aretoko kideen arabera, obra oso ezaguna eta duela 100 urte baino gehiago argitaratutakoa izan arren, oso gutxitan antzeztu da. Hauxe da Luces de Bohemia antzezlanaren sinopsia: “Max Estrella andaluziarraren bizitzaren azken 24 orduak kontatzen ditu lanak, dagoeneko zaharra, miserablea eta itsua zegoela. Madril ilun, uher, marjinal eta lizun batean barrena egindako erromesaldian, Don Latino de Hispalis lagun zuela, eta garai hartako Madril bohemio batetako pertsonaia ezberdinek emango dioten erantzunekin. Antzezlana herrialde itxuragabe, bidegabe eta zapaltzaile baten parabola tragiko bihurtzen da, 1920ko Espainia, degradatua eta ustelkeriaz beteteako herri laua. Gizarte esperpentikoa, gaurkotasuna gehiegi gogorarazten diguna.”

Bestalde, abuztuan estreinaldi batekin emango diote hasiera denboraldiari. El trepa de palacio du izena Pabelloi 6k ekoiztutako lan berriak eta Antonio Ugarte bizkaitarraren igoeraren eta gainbeheraren istorioa kontatzen du. Ugarte Nafarroan jaio eta Madrilera joan zen bizitza “hobe” baten bila. Nerabezaroan dantza maisu gisa aritu zen lanean, Fernando VII.a absolutista ezagutu eta negozio gizona bilakatu zen arte. Hala dio sinopsiak: “Gutxitan ikusi izan da Espainian Fernando VII.aren erresumaldian gertatutako ustelkeri eta basakeri bezalakorik. Erregearen gogokoenak, lagun eta hurbilenekoak, lan-banatzaileak, lausangeri zalapartariak, kezkarik gabeko goranahiak… guztiek zuten norberaren garrantzia auzitegi txundigarrian. Baina bat ere ez zuen jakin Antonio Ugarte dantzaria bezala errege absolutuaren nahien inguruan dantza egiten, bizkaitar berritsu eta bizi honek baino ez du merezi “Jauregiko Sitsa” -ren titulu lotsagabea”.

El Trepa de Palacio Braulio Cortések idatzitako bufo musikala da. Zuzendaritza lanak Felipe Lozak egin ditu eta aktoreen artean, Leire Ormazabal, Diego Perez, Aitor Echarte, Nahikari Rodriguez, Unai Eleizalde eta Yeray Vazquez aurkitzen dira. Erabateko estreinaldia abuztuaren 19an izango da eta irailaren 11ra arte egongo da ikusgai.