Beste urte batez, Berbaizu Euskara Elkartetik lehenengo barrutiko saltoki bati Errekaurti saria eman diogu, euskararen eta euskal kulturaren alde egindako lanagatik. Oraingoan, eta sareen bidez bozkatzeko aukera eman eta gero, San Inazioko Etxean liburudendak jaso du.
Etxean Agirre lehendakariaren 135. zenbakian kokatutako liburudenda da, eta bertara sartzen denak arnastuko du liburuekiko mimoa, eta ikusiko du bezeroak jasotzen duen tratu bikaina. Berbaizu Euskara Elkartetik, Errekaurti sariaren bidez tokiko saltokiei keinua egin nahi diegu, auzoaren alde eta hizkuntza-dinamiketan eragiteko ezinbestekoak direlako. Horregatik, Etxean liburudendaren kasuan, euskalgintzako kideok beti etxean sentiarazi gaituztelako, aitortza egin nahi izan diegu honakoan; are, sareetako bozkek frogatzen dute batek baino gehiagok duela sentimendu hori.
Euskararen aldeko partida kalean jokatzen da, hein handi batean, eta gu San Inazio euskaldunago bat lortzeko gurekin jokatzeko prest dauden jokalarien bila gabiltza etengabe; horrela, Errekaurtiko alabaren begirada hunkigarriak lagunduta, jarrai dezagun gure auzoetako paisaia linguistikoa aldatzen, ekintza ezberdinetan elkarri eusten, kultur ekimen euskaldunak bultzatzen, aisialdia euskaraz defendatzen.
Eskerrik asko euskararen alde egiten duzuen guztioi, eta zorionak, Etxean liburudenda!